Stundin hefur spurt alla frambjóðendur* til forseta tíu spurninga er varða nokkur af helstu deilu og álitamálum líðandi stundar. Hér ber að líta svör þeirra við sjöttu spurningunni:
Telur þú að femínismi sé mikilvæg jafnréttishreyfing eða sé of öfgafullur til þess að geta komið jafnréttisbaráttu til hjálpar?
Andri Snær Magnason
Ég tel að hún sé mikilvæg jafnréttishreyfing. Ég hélt að það væri í lagi með þetta. Ef þú hefðir spurt mig fyrir fimm árum, og ég þykist nú alveg vera ágætlega meðvitaður, en áður en jafnréttisbylgjan reis aftur þá hefði ég sagt að þetta væri nú eiginlega komið í höfn, og að þetta væri allt komið vel á veg. En það er alveg magnað hvað mikið bættist við, hvað þau urðu mikið sterkari kynjagleraugun. Þannig að femínisminn hefur klárlega verið jákvæð hreyfing. En á hinn bóginn, ef talað er við foreldra og kennara þá hafa þeir miklar áhyggjur af strákum, þannig að það þýðir ekki að einblína bara á annað kynið. Það sem ég eiginlega öfunda stelpurnar af er að þegar þær fá femínismann fá þær hugsjón, og það er svo gott og þroskandi að brýna sig við hugsjón. Strákarnir hafa ekkert svona til að grípa í. Þeir verða að hafa aðgang að þessari hugsjón líka, það má ekki útiloka þá. Sú staðreynd að strákar þurfa að fá einum lægra til að komast inn í Versló staðfestir kynbundinn mun sem þarf að ræða, vegna þess að hann getur skapað allskonar vandamál í framtíðinni. Femínisku tækin geta vísað okkur veginn hvernig eigi að tækla þetta. Ég var í tíma um daginn þar sem ég var að tala um femínisma uppi í Borgarholtsskóla, og var að ræða um það afhverju ég þurfi að upplifa mig sem fyrst og fremst karl með hagsmuni karla, og að jafnréttisbaráttan muni koma niður á mér í framtíðinni. Í staðinn fyrir að líta á mig sem manneskju í vinahópi þar sem allir muni spjara sig ef jafnrétti er náð.
Ástþór Magnússon
Barátta fyrir jafnrétti og mannréttindum má aldrei einkennast af öfgum. Mér sýnist að Íslendingar standi framarlega þegar kemur að jafnrétti kynjana.
Elísabet Jökulsdóttir
Ég held að femínismi sé bara mjög fínn. Þetta er bara eins og að breyta um mataræði. Það eru allskonar leiðir, alveg eins og með femínisma. Þessi er kannski öfgafullur og þessi ekki, þessi er hófsamur. En það vilja allir jafnrétti. Og nei, femínismi er aldrei öfgafullur.
Guðni Th. Jóhannesson
Femínismi í þeim skilningi eins og ég og fleiri skilja hann er mjög jákvæð stefna. Aftur vil ég leggja áherslu á það að við séum öll jöfn fyrir lögunum og þannig álít ég að femínismi færi okkur fram á veg. Góður femínismi snýst einfaldlega um það að það sé ekkert spurt hvers kyns ertu, heldur hver ertu, og þarf þetta að vera eitthvað flóknara en það?
Guðrún Margrét Pálsdóttir
Ef femínismi er hugsjónin um samfélagslegt réttlæti sem felst í jafnrétti kynjanna þá tel ég hann mikilvæga jafnréttishreyfingu. Öfgafull barátta hugnast mér tæpast.
Halla Tómasdóttir
Femínismi er fallegt hugtak sem felur í sér að meta eigi konur og stúlkur að verðleikum og þær eigi ekki að teljast annars flokks eða óæðri. Inntakið má yfirfæra á ýmsan máta, þannig á að meta fólk að verðleikum ekki bara óháð kyni heldur einnig óháð uppruna, búsetu, líkamlegri getu, fjárhagsstöðu og svo framvegis, og það ber að sýna öllum virðingu. Þannig að já, ég tel femínisma mikilvæga jafnréttishreyfingu og ég er femínisti.
Hildur Þórðardóttir
Ég vil bara tala um jafnrétti. Það er nú oft þannig að til að koma á breytingum þurfum við að fara öfganna á milli, en við þurfum kannski ekki að fara algjörlega út í kvennaræði til þess að losna við karlaræðið. Þetta eru bara ákveðnar hreyfingar í samfélaginu, sveiflukenndar hreyfingar. Svo finnum við einhverja millileið. Ég vil frekar kalla þetta jafnrétti af því orðið femín felur í sér konur. Ég er jafnréttissinni og vil fá jafnan rétt fyrir alla, hvort sem það er kyn eða kynhneigð eða litarhaft eða trúarbrögð. Við erum öll jöfn og öll jafnmikilvæg og merkileg. Við verðum að viðurkenna þessi kvenlegu gildi, að karlmenn leyfi sér að vera mjúkir og konur leyfi sér að vera sterkar án þess að vera grimmar. Eins og ég, ég er sterk kona, þótt ég sé alveg mjúk. Karlmenn geta verið sterkir þótt þeir séu mjúkir. Karlmenn geta sýnt tilfinningar þótt þeir séu í viðskiptum. Við finnum bara millileiðina og leyfum okkur að vera hvort tveggja, ying og yang, bæði karlmenn og konur. Konur þurfa líka að finna styrkinn sinn og kannski er þessi femínismi þeirra tól til þess. Og svo er það orðræðan. Forseti er karlkyns orð, og svo er sagt „Þegar maður …“ eitthvað. Þegar allt er karlkyns, þá er orðið femínismi kannski það afl sem við þurfum til að fara út úr öllu þessu karllæga.
Sturla Jónsson
Ég held þeir ættu að lesa 65. greinina í stjórnarskránni, hún er ótrúlega einföld. Það eru allir jafnir fyrir lögum.
* Frambjóðandinn Davíð Oddson fékk spurningarnar sendar og tækifæri til þess að svara þeim en hefur ekki gert það. Berist svör frá honum mun þeim verða bætt við jafnóðum.
Forsetakosningar 2016
Jón Trausti Reynisson
Nýfasisminn teygir sig til Íslands
Karl Th. Birgisson
Saga af tveimur forsetum: Helgi fokking Björns. Og hnykkurinn
Guðni minnir Trump á jafnrétti í heillaóskum sínum
Jón Trausti Reynisson
Innreið Íslands í nútímann
Hver er Guðni Th?
Athugasemdir