Rússar náðu sinni mestu framrás í Úkraínu í heilt ár

Rúss­neski her­inn náði mestu fram­rás sinni í Úkraínu í heilt ár í nóv­em­ber­mán­uði, sam­kvæmt grein­ingu AFP á gögnum frá banda­rísku hug­veit­unni Institute for the Study of War (ISW).

Í nóv­em­ber­mán­uði náði Rússland yfir­ráðum yfir 701 fer­kíló­metra svæði, sem eru næst­mestu land­vinn­ingar í inn­rás þeirra á einum mán­uði, næst á eftir nóv­em­ber 2024, ef frá eru taldir fyrstu mán­uðir inn­rás­ar­innar þegar víg­línan var mjög hreyf­an­leg.

Ráða nú 19,3% Úkraínu

Í lok nóv­em­ber réð rúss­neski her­inn yfir 19,3 pró­sentum af land­svæði Úkraínu, að fullu eða að hluta, sam­kvæmt grein­ingu á gögnum frá ISW, sem vinnur með Critical Threats Project.

Þetta nær yfir svæði sem bæði stjórn­völd í Kyiv og hern­að­ar­sér­fræð­ingar segja að séu undir stjórn Rúss­lands, auk þeirra svæða sem her Rússa seg­ist hafa yfir­ráð yfir.

Áður en Rússland réðst inn í febr­úar 2022 voru um sjö pró­sent af land­svæði Úkraínu – Krím­skagi og svæði í Donbas-hér­aði í austri – undir stjórn Rússa.

Fram­sóknin í nóv­em­ber á sér stað á sama tíma og diplómat­ísk við­leitni til að binda enda á átökin hefur auk­ist, en Banda­ríkin hafa átt í samn­inga­við­ræðum við bæði löndin.

Vladimír Pútín, for­seti Rúss­lands, ítrek­aði kröfur sínar í síð­ustu viku um að Úkraína léti af hendi land­svæði – þar á meðal land sem Moskva ræður ekki yfir – til að sam­komu­lag gæti náðst. Annars myndu Rússar „berj­ast til síð­asta Úkra­ínu­manns“.

Frá því Donald Trump tók við emb­ætti for­seta Banda­ríkj­anna hafa þau því sem næst hætt öllum hern­að­ar­stuðn­ingi við Úkraínu.

Frá árs­byrjun 2025 hefur Rússland náð yfir­ráðum yfir nærri 5.400 fer­kíló­metrum af land­svæði í Úkraínu, sem er tæpum 2.000 fer­kíló­metrum meira en á sama tíma­bili árið áður.

Í nóv­em­ber hægði þó áfram á fram­sókn Rússa í Donetsk-hér­aði – þunga­miðju bar­dag­anna milli fylk­ing­anna.

Pokrovsk komin að falli

Rússar náðu um 130 fer­kíló­metrum af Donetsk í síð­asta mán­uði, sam­an­borið við meira en tvö­falt það að með­al­tali í öðrum mán­uðum árs­ins, og ræður nú yfir meira en 81 pró­sent hér­aðs­ins.

Sveitir Pútíns berj­ast þar nú um að ná borg­inni Pokrovsk, hern­að­ar­lega mik­il­vægri mið­stöð sem myndi hafa veru­leg áhrif á varnir og birgða­flutn­inga Úkra­ínu­manna ef hún félli.

Það var þó í Zaporizhzhia-hér­aði í suðri sem rúss­neskar her­sveitir náðu mestri fram­sókn í nóv­em­ber, þar sem þær náðu 272 fer­kíló­metrum, jafn miklu og á fjórum mán­uðum þar á undan sam­an­lagt, en í Dnipropetr­ovsk-hér­aði náðu þær tæpum 200 fer­kíló­metrum.

Í sept­em­ber 2022 lýstu Rússar því yfir að þeir hefðu form­lega inn­limað Zaporizhzhia-, Donetsk-, Lúhansk- og Kherson-hér­uðin, þrátt fyrir að hafa ekki fulla hern­að­ar­lega stjórn á þeim öllum.