Guðni Th. Jóhannesson, forseti Íslands, hefur sent Donaldi Trump, nýkjörnum forseta Bandaríkjanna, heillaóskir. Þetta kemur fram í fréttatilkynningu frá skrifstofu forseta Íslands. Í bréfi Guðna til Trump segir meðal annars að enda þótt Bandaríkin væru eitt stærsta lýðræðisríki veraldar en Ísland eitt hið minnsta þá deildu þjóðirnar mörgum mikilvægum gildum; „við styðjum einhuga frelsi til hugsana og tjáningar, jafnrétti kynjanna og höfum í hávegum jafnan rétt allra þegna óháð litarhafi eða trú.“

Eins og Stundin greindi frá fyrr í dag þá hefur Guðni ekki tjáð sig við fjölmiðla í dag vegna forsetakosninganna í Bandaríkjunum. 

Tilkynning skrifstofu forseta í heild:

HEILLAÓSKIR TIL NÝKJÖRINS FORSETA BANDARÍKJANNA

Forseti hefur sent Donald Trump, nýkjörnum forseta Bandaríkjanna, heillaóskir frá sér og íslensku þjóðinni í kjölfar sigurs hans í forsetakosningunum.

Forseti áréttaði í kveðju sinni rótgróna samvinnu og vináttu þjóðanna tveggja og langa sameiginlega sögu sem teygði anga sína allt aftur til þess er sæfarendur frá Íslandi og Grænlandi tóku land í Norður-Ameríku fyrir meira en þúsund árum. Öldum síðar hefðu þúsundir Íslendinga flutt búferlum vestur um haf og leitað nýrra tækifæra sem nýbúar í frjálsum samfélögum. 

Enda þótt Bandaríkin væru eitt stærsta lýðræðisríki veraldar en Ísland eitt hið minnsta deildu þjóðirnar mörgum mikilvægum gildum; við styðjum einhuga frelsi til hugsana og tjáningar, jafnrétti kynjanna og höfum í hávegum jafnan rétt allra þegna óháð litarhafti eða trú.