Rodrigo Duterte, fyrrverandi forseti Filippseyja, tók persónulega saman „dauðalista“ og stærði sig af morðum sem framin voru í „stríði hans gegn eiturlyfjum“, að því er saksóknari Alþjóðaglæpadómstólsins (ICC) hélt fram í dag í málaferlum vegna glæpa gegn mannkyninu.
Á öðrum degi skýrslutaka í málinu gegn Duterte lagði Edward Jeremy, saksóknari Alþjóðaglæpadómstólsins, fram sláandi vitnisburð, þar á meðal ásakanir um að höfuð barna hefðu verið vafin inn í límband og þau kyrkt til bana.
„Sem forseti nafngreindi Duterte opinberlega einstaklinga sem hann sagði að væru viðriðnir eiturlyf og margir þeirra enduðu sem fórnarlömb í svokölluðu stríði hans gegn eiturlyfjum,“ sagði Jeremy.
„Duterte-listinn“ var „í rauninni dauðalisti“, sagði Jeremy og vitnaði í vitni, og sýndi myndband af Duterte sjálfum þar sem hann sagði: „Ég er eini maðurinn sem ber ábyrgð á þessu öllu.“
Duterte stendur frammi fyrir þremur ákærum Alþjóðaglæpadómstólsins um glæpi gegn mannkyninu, en saksóknarar halda því fram að hann hafi átt aðild að að minnsta kosti 76 morðum á árunum 2013 til 2018.
Saksóknarar segja að þetta sé „aðeins brot“ af þeim þúsundum sem talið er að hafi verið drepnar í „stríði hans gegn eiturlyfjum“ sem borgarstjóri Davao-borgar og síðan forseti.
„Eins og vitni sögðu, var oft beint spjótum að fátækum, því þeir voru þeir sem voru síst líklegir til að leggja fram kvartanir á hendur lögreglunni,“ sagði Jeremy.
„Líkin hrannast upp“
Jeremy spilaði myndbrot af Duterte þar sem hann grínaðist með „aftökur án dóms og laga“ í ræðu.
„Og í þessum íburðarmikla, gyllta sal hlæja embættismennirnir með forseta sínum á meðan hann stærir sig af færni sinni í aftökum án dóms og laga,“ sagði Jeremy.
„Og úti á götum Filippseyja hrannast líkin upp.“
Jeremy hélt því fram að næstum 1.500 manns hefðu þegar verið drepnir þegar þetta myndband var tekið.
Saksóknarinn sagði að í tveimur tilvikum hefðu börn á aldrinum 14 eða 15 ára verið tekin í gæsluvarðhald.
„Í hvoru tilviki fyrir sig vafði lögreglan höfuð barnsins inn í límband. Svo enginn gæti heyrt þau öskra. Og kyrkti síðan barnið til bana með vír,“ sagði Jeremy.
„Það er erfitt að ímynda sér hræðilegri endalok tveggja lífa sem voru varla hafin.“
Vikulöng málaferli Alþjóðaglæpadómstólsins eru ekki réttarhöld heldur yfirheyrsla til „staðfestingar á ákærum“, sem gerir dómurum kleift að vega og meta hvort halda eigi áfram með réttarhöld.
Annar saksóknari, Robynne Croft, lýsti meintum glæpum sem „víðtækri og kerfisbundinni árás“ á filippseysku þjóðina.
Morðin voru „mjög skipulögð, fyrirfram ákveðin og samræmd“ og án „nauðsynlegs framlags“ Duterte hefðu þau ekki átt sér stað, að því er Croft hélt fram.
Duterte, sem er 80 ára, er ekki viðstaddur í réttarsalnum eftir að hafa nýtt sér rétt sinn til að vera fjarverandi.
Duterte segist saklaus og veikburða
Verjendateymi hans segir hann vera veikburða og með hnignandi vitsmunagetu. Saksóknarar og fórnarlömb halda því fram að hann sé við góða heilsu en vilji ekki horfast í augu við ástvini fórnarlambanna.
Dómstóllinn úrskurðaði hann hæfan til að mæta en veitti honum rétt til að vera fjarverandi.
Þegar yfirheyrslum lýkur á föstudag mun dómstóllinn taka sér allt að 60 daga til að ákveða hvort halda eigi áfram með full réttarhöld, venjulega með skriflegum dómi.
Nicholas Kaufman, verjandi Duterte, sagði í gær að skjólstæðingur hans „héldi fram sakleysi sínu með öllu“.
Kaufman hélt því fram að þótt Duterte hafi notað „stóryrði og ýkjur“ í ræðum sínum, hafi hann einnig oft skipað yfirvöldum að skjóta aðeins í sjálfsvörn.
Dómstóllinn í sigti Bandaríkjanna
Alþjóðaglæpadómstóllinn á í vök að verjast vegna aðgerða stórvelda gegn honum. Nokkrir dómarar Alþjóðaglæpadómstólsins hafa verið beittir refsiaðgerðum af Bandaríkjunum, með þeim afleiðingum að ferðafrelsi þeirra er takmarkað, kreditkortum lokað og svo aðgöngum að vefþjónstu, til dæmis Gmail.
Þá hafa dómarar verið dæmdir í Rússlandi, að þeim fjarstöddum, fyrir að gefa út handtökutilskipun á hendur Vladimir Pútín Rússlandsforseta vegna stríðsglæpa í Úkraínu.
Talið er mögulegt að dómstóllinn gæti beint spjótum sínum að Donald Trump Bandaríkjaforseta vegna drápa án dóms á laga á meintum „fíkniefnahryðjuverkamönnum“ á Karíba- og Kyrrahafi síðustu mánuði, en vel á annað hundrað grunaðra smyglara hafa verið drepnir í loftárásum Bandaríkjanna.
Sjálfur hrósaði Trump Duterte í hástert í símtali sem hefur verið birt, frá árinu 2017.
„Ég vildi bara óska þér til hamingju, því ég er að heyra af ótrúlega góðu verki sem þú ert að vinna í fíkniefnavandanum,“ sagði Trump við Duterte, samkvæmt endurriti samtalsins. „Mörg lönd glíma við þetta vandamál, við glímum við vandamál, en þú ert að standa þig frábærlega og ég vildi bara hringja og segja þér það.“
Athugasemdir (1)