Guðni Th. Jóhannesson forsetaframbjóðandi hefur uppfært heimasíðu sína og birtir nú nöfn allra þeirra sem sitja í kosningastjórn framboðsins. Meira en helmingur þeirra eru ýmist virkir meðlimir í Sjálfstæðisflokknum eða hafa komið að starfi flokksins í gegnum tíðina.
Líkt og Stundin greindi frá á sunnudag á fólkið sem formlega stendur að baki framboði Guðna, samkvæmt þeim upplýsingum sem gefnar hafa verið upp á vef framboðsins, það sammerkt að tilheyra Sjálfstæðisflokknum og vera virkir þátttakendur í störfum flokksins, fyrir utan eiginkonu Guðna sem virðist ekki hafa neinar tengingar við íslenska stjórnmálaflokka.
Stjórn félagsins sem ber fjárhags- og skipulega ábyrgð á framboði Guðna er skipuð Þorgerði Önnu Arnardóttur, Lúðvík Erni Steinarssyni og Elizu Reid, eiginkonu Guðna. Þorgerður Anna er í miðstjórn Sjálfstæðisflokksins og Lúvík Örn er formaður fulltrúaráðs Sjálfstæðisflokksins í Garðabæ. Í framkvæmdastjórn framboðsins sitja, auk Þorgerðar Önnu, þeir Magnús Lyngdal Magnússon og Friðjón R. Friðjónsson. Magnús sat síðasta landsfund Sjálfstæðisflokksins og var kosinn í allsherjar- og menntamálanefnd flokksins og Friðjón er varaþingmaður Sjálfstæðisflokksins.
Stór hópur kemur að framboðinu
Nýuppfærðar upplýsingar á heimasíðu Guðna sýna nú að kosningastjórn hans samanstendur af fjölbreyttum hópi fólks með tengsl við fleiri stjórnmálaflokka. Má þar meðal annars nefna Huginn Frey Þorsteinsson og Kolbein Óttarsson Proppé, en báðir starfa fyrir ráðgjafafyrirtækið Aton. Huginn Freyr hefur gegnt trúnaðarstörfum fyrir Vinstri hreyfinguna grænt framboð, og var meðal annars aðstoðarmaður Steingríms J. Sigfússonar þegar hann var fjármálaráðherra. Kolbeinn starfaði áður sem blaðamaður hjá 365 miðlum, en bauð sig fram í alþingiskosningum fyrir vinstri græna árið 2003. Þá er Margrét S. Björnsdóttir, verkefnisstjóri við Háskóla Íslands, einnig í kosningastjórn Guðna en hún var áður formaður framkvæmdastjórnar Samfylkingarinnar.
Í kosningastjórn Guðna sitja jafnframt Þengill Björnsson og Janus Arn Guðmundsson, báðir miðstjórnarmenn í Sjálfstæðisflokknum, Erla María Tölgyes sem var á framboðslista hjá Sjálfstæðisflokknum í síðustu Alþingiskosningum, Stefanía Sigurðardóttir, kosningastjóri Sjálfstæðisflokksins í síðustu borgarstjórnarkosningum og Heimir Hannesson, fyrrverandi hagsmunafulltrúi Stúdentaráðs sem látið hefur að sér kveða í Heimdalli, ungliðahreyfingu Sjálfstæðisflokksins í Reykjavík. Meira en helmingur þeirra sem sitja í kosningastjórn Guðna hafa tekið þátt í starfi Sjálfstæðisflokksins.
Spyr ekki vini sína um flokksskírteini
Guðni var spurður út í tengslin við Sjálfstæðisflokkinn í Speglinum á Rás 1 í gær. „Þau sem eru í stjórn framboðsins eru vinir mínir frá fornu fari og ég spyr ekki vini mína um flokksskírteini. Svo eru margir fleiri sem koma að framboðinu, blessunarlega,“ sagði Guðni.
Hvað varðar þau þrjú sem sitja í framkvæmdastjórn framboðsins sagðist Guðni hafa alist upp í sömu götu og Þorgerður Anna, Friðjón sé fjölskylduvinur og að hann hafi kynnst Magnúsi í sagnfræðinni í gamla daga. „Allt þetta fólk tengist Sjálfstæðisflokknum en það kemur mér ekki við. Ég hef aldrei verið í flokki. Allar mínar rannsóknir, öll mín verk, bera því vitni að ég hef aldrei látið flokkspólitík ráða gerðum mínum og ég fer ekki að byrja á því núna.“
„Allt þetta fólk tengist Sjálfstæðisflokknum en það kemur mér ekki við. Ég hef aldrei verið í flokki.“
Ástþór Magnússon, mótframbjóðandi Guðna, hefur ítrekað gert teymið að baki Guðna að umtalsefni í umræðuþáttum vegna forsetakosninganna. Í gær sauð að lokum upp úr og hótuðu þáttastjórnendur að vísa Ástþóri úr hljóðveri.
Þau sem starfa að framboði Guðna
Stjórn Félags um forsetaframboð Guðna Th. Jóhannessonar:
Þorgerður Anna Arnardóttir formaður, Lúðvík Örn Steinarsson og Eliza Reid.
Framkvæmdastjórn kosningabaráttunnar:
Þorgerður Anna Arnardóttir
Magnús Lyngdal Magnússon
Friðjón R. Friðjónsson
Kosningastjórn:
Eliza Reid
Erla María Tölgyes
Friðjón R. Friðjónsson – Samskipti
Heimir Hannesson
Huginn Freyr Þorsteinsson
Högni Óskarsson
Janus Arn Guðmundsson
Jóhannes Ólafur Jóhannesson
Kolbeinn Óttarsson Proppé
Magnús Lyngdal Magnússon – Framkvæmd
Margrét S. Björnsdóttir
Pétur Hrafn Arnason
Stefanía Sigurðardóttir
Sveinn Guðmar Waage
Þengill Björnsson
Þorgerður Anna Arnardóttir – Umsýsla
Hlutverk innan kosningaskrifstofu í Reykjavík
Auglýsingar: Einar Geir Ingvarsson
Ferðalög frambjóðanda: Jóhannes Ólafur Jóhannesson
Fjármál og bókhald: Þorgerður Anna Arnardóttir
Kosningamiðstöð: Helga Steinunn Hauksdóttir og Inga Lára Kristinsdóttir, Jóhanna Ýr Jónsdóttir
Meðmælendaskráning: Pétur Hrafn Arnason
Myndbandsgerð: Håkon Broder Lund, Ágúst Örn Ágústsson, Jóhanna Ýr Jónsdóttir
Myndir og upptaka: Håkon Broder Lund
Ritstjóri vefsíðu: María Ásdís Stefánsdóttir
Samfélagsmiðlar: María Ásdís Stefánsdóttir, Arndís Þorgeirsdóttir, Jóhanna Ýr Jónsdóttir
Samskipti við fjölmiðla: Friðjón R. Friðjónsson
Samskipti við kjósendur og sjálfboðaliða: Arna Arnardóttir og Hlynur Einarsson
Umboðsmaður framboðsins og samskipti við kjörstjórn: Þorgerður
Umsjón samfélagsmiðla: Sveinn Guðmar Waage
Umsjón á dagskrá frambjóðanda: Erla María Tölgyes
Utankjörfundaratkvæðagreiðsla: Ingibjörg Stefánsdóttir
Vefsíða og forritun: Daníel Freyr Hjartarson
Forsetakosningar 2016
Jón Trausti Reynisson
Nýfasisminn teygir sig til Íslands
Karl Th. Birgisson
Saga af tveimur forsetum: Helgi fokking Björns. Og hnykkurinn
Guðni minnir Trump á jafnrétti í heillaóskum sínum
Jón Trausti Reynisson
Innreið Íslands í nútímann
Hver er Guðni Th?
Athugasemdir