Fimm hljómsveitir sem voru á dagskrá Þjóðhátíðar í Vestmannaeyjum ætla að hætta við að spila vegna orðræðu og verklags Páleyjar Borgþórsdóttur, lögreglustjóra, nema tafarlaust komi til skýrrar stefnubreytingar frá bæjaryfirvöldum og lögreglu.

Þetta kemur fram í yfirlýsingu frá hljómsveitunum og tónlistarmönnunum Retro Stefson, Úlfi Úlfi, Agent Fresco, Emmsjé Gauta og Sturlu Atlas . 

„Við getum ekki með góðri samvisku stigið á svið meðan yfirvöld í Vestmannaeyjum taka á málum með þeim hætti sem birstist okkur,“ segir Unnsteinn Manuel Stefánsson, söngvari í Retro Stefson, í samtali við Stundina.

Yfirlýsingu hljómsveitanna, sem upphaflega var lesin upp í myndskeiði á vef RÚV, má lesa í heild hér að neðan með leyfi tónlistarmannanna:

Okkur blöskra viðbrögð yfirvalda í Vestmanneyjum við háværum kröfum samfélagsins undanfarna daga. Þjóðhátíð í Vestmannaeyjum er frábær hátíð en kynferðisbrot á aldrei að þagga niður.

Þjóðhátið, Vestmanneyingar og við öll eigum að úthýsa kynferðisofbeldi með öllum tiltækum ráðum.

Í ljósi orðræðu og verklags lögreglustjórans í Vestmanneyjum undanfarna daga sem gengur þvert á þöggunarumræðuna sem hefur átt sér stað undanfarin ár í íslensku samfélagi, sjáum við okkur ekki annan kost í stöðunni en að draga okkur úr dagskrá Þjóðhátíðar í ár nema skýr stefnubreyting komi frá bæjaryfirvöldum og lögreglustjóra og það strax.

Við getum ekki, sem flytjendur og listamenn á þessari hátið, komið fram vitandi það að einhverjir úr áhorfendaskaranum verði fyrir kynferðisofbeldi ef að bæjaryfirvöld og lögreglustjórinn í Vestmanneyjum hafa ekki gert allt sem í þeirra valdi stóð til að koma í veg fyrir það.

Okkar krafa er sú að lögregluyfirvöld í Vestmanneyjum temji sér þau vinnubrögð sem Landsspítalinn og Stígamót telji vera æskilegust.

Og þá tala ég fyrir hönd eftirfarandi hljómsveita:
Retro Stefson, Úlfur Úlfur, Agent Fresco, Emmsjé Gauti og Sturla Atlas.
Kær kveðja Strákarnir