Fjölskyldu Eyjólfs sagt að ræða ekki við fjölmiðla ef þau vilja farsæla lausn

Allir fjöl­skyldu­með­limir hins fimm ára gamla Eyjólfs, bæði úr föður- og móð­ur­fjöl­skyldu hans, hafa frá og með gær­kvöld­inu tekið þá ákvörðun að hætta að ræða við fjöl­miðla. Samkvæmt heim­ildum Stund­ar­innar er það gert af ótta við gagn­að­gerðir norsku barna­vernd­ar­innar, en fjöl­skyldan fékk þau skila­boð í gær að hún ætti ekki að tala meira við fjöl­miðla á Íslandi um mál Eyjólfs ef það ætti að vera mögu­leiki á því að finna honum fóst­ur­heim­ili á Íslandi.

13 dagar eru þar til Eyjólfur verður fluttur til Noregs og allt útlit fyrir að kraf­ist verði aðfarar lög­reglu á heim­ili móð­ur­fjöl­skyldu Eyjólfs nú í byrjun des­em­ber.

„Þetta eru ekk­ert nema hót­anir, en hvað eigum við að gera? Nú þorum við ekki að tjá okkur um þetta mál lengur því við viljum ekki missa Eyjólf til Noregs. Pældu í því hvað það er ljótt. Fyrst áttu krakk­arnir að afsala sér öllum rétti til þess að sækj­ast eftir for­sjá drengs­ins og núna er búið að múl­binda alla fjöl­skyld­una með hót­unum um að ef við segjum eitt­hvað þá bara taka þeir hann til Noregs,“ segir fjöl­skyldu­með­limur Eyjólfs litla sem vildi ekki koma fram undir nafni. Rætt var um að það „borg­aði sig ekki að gera Norð­menn­ina reiða.“

Stillt upp við vegg

Málið er í algjörri patt­stöðu. Beðið sé eftir við­brögðum for­eldra Eyjólfs við þeim „kostum í stöð­unni“ sem kynntir voru fyrir þeim á fundi Barna­vernd­ar­stofu á föstu­dag­inn. Líkt og Stundin hefur greint frá þá var upp­lifun fjöl­skyldu Eyjólfs ekki sú sama og upp­lifun Barna­vernd­ar­stofu af umræddum fundi. Fjöl­skyldu Eyjólfs fannst eins og sér væri stillt upp við vegg með ósann­gjörnum skil­yrðum en Barna­vernd­ar­stofa sagði að ein­ungis hefðu verið ræddir kostir í stöð­unni en engin skil­yrði.

Umræddir kostir voru, líkt og fjöl­skyldu­með­limur Eyjólfs bendir á, að móðir Eyjólfs geri sér­staka dómsátt við norsku barna­vernd­ina í dóms­máli sem hún höfð­aði á hendur stofn­un­inni eftir að hafa verið svipt for­ræði. Það mál er enn í gangi í Noregi en norska barna­verndin vill það út af borð­inu. Þá þarf faðir Eyjólfs einnig að stað­festa skrif­lega að hann muni ekki sækj­ast eftir for­sjá drengs­ins með aðstoð dóm­stóla þar­lendis. Ef þau gera það þá mun norska barna­verndin skuld­binda sig til þess að finna fóst­ur­heim­ili handa drengnum á Íslandi í sam­starfi við íslensk barna­vernd­ar­yf­ir­völd. Eyjólfur yrði þó aldei vistaður hjá fjöl­skyldu­með­limum, hvorki hjá föður- né móð­ur­fjöl­skyldu hans.

Binda vonir við Bjarna Benediktsson

„Þá höfum við engin svör fengið af hverju faðir drengs­ins fær ekki tæki­færi á að ala son sinn upp. Hann er í sömu stöðu og fjöl­margir ein­stæðir feður sem ekki voru skráðir í sam­búð eða giftir þegar börn þeirra fædd­ust. Þegar það ger­ist þá fær móð­ir­inn fulla for­sjá strax. Þarna er vegið að rétt­indum föður Eyjólfs ein­fald­lega vegna þess að við erum með bilað kerfi sem útdeilir for­sjá án þess að taka til skoð­unar aðkomu feðra. Þá er líka skrítið að gefa ekki þess­ari ungu móður tæki­færi. Hún hefur greini­lega átt mjög erf­iða æsku og fór snemma út af braut­inni en hvers á hún að gjalda? Á fólk ekki skilið annað tæki­færi? Af hverju er þetta ekki sett upp þannig að hún yrði áfram undir vök­ulu auga barna­vernd­ar­yf­ir­valda, skilar þvagprufum og sýnir í verki að hún geti staðið undir þeirri ábyrgð að ala upp barn og á meðan er sonur hennar í tíma­bund­inni vistun. Af hverju fær hún ekki það tæki­færi?“

Samkvæmt heim­ildum Stund­ar­innar hafa fjöl­skyldu­með­limir Eyjólfs reynt að ná sam­bandi við sitj­andi inn­an­rík­is­ráð­herra, Bjarna Bene­dikts­son, en án árang­urs.

Orð Bjarna Bene­dikts­sonar, sitj­andi fjár­mála- og inn­an­rík­is­ráð­herra, í útvarps­við­tali hjá Harma­geddon hafi gefið þeim von en síðan þá hafi þau ekk­ert heyrt í Bjarna eða öðrum í rík­i­s­tjórn­inni. Í við­tal­inu sagð­ist Bjarni meðal ann­ars að hann væri að fylgj­ast mjög vel með mál­inu en bíða þyrfti dóms Hæsta­réttar. Þeir fjöl­skyldu­með­limir sem Stundin ræddi við sögðu að nú væri komið dálítið síðan að dómur féll en þau hafi ekk­ert heyrt. Þau hafi reynt að ná sam­band við Bjarna, bæði í gegnum fjár­mála­ráðu­neytið og inn­an­rík­is­ráðu­neytið en ekki haft erindi sem erf­iði.