Í gær opnaði Dunkin Donuts á Laugarvegi. Áformað er að tveir af 16 nýjum veitingastöðum undir merkjum Dunkin Donuts opni fyrir áramót. 

Sérfræðingur í lýðheilsumálum hjá Landlæknisembættinu varar við því að aukið aðgengi að sykruðum og feitum kleinuhringjum sé líklegt til að auka neyslu á þeim.

„Þetta er ekki jákvæð þróun,“ segir Hólmfríður Þorgeirsdóttir, verkefnis­stjóri næringar á sviði áhrifaþátta heilbrigðis hjá Landlæknisembættinu.

Líklegt til að auka neyslu á óhollustu

„Auðvitað er það áhyggjuefni ef aðgengi að óhollustuvöru er aukið en aðgengi og verð er það sem hefur mest áhrif á neyslu. Við vildum frekar sjá að ýtt væri undir ávaxta-  og grænmetisframboðið og einnig á heilkornavörum. Neysla á þessum fæðutegundum stuðlar að góðri heilsu og vellíðan og þannig má minnka líkur á ýmsum langvinnum sjúkdómum auk þess sem auðveldara er að viðhalda heilsusamlegu holdafari,“ segir Hólmfríður.

Á matseðli Dunkin Donuts má finna sykraða drykki og kleinuhringi, en einnig ýmsar samlokur. „Boðið verður upp á mikið úrval af kleinuhringjum og samlokum, meðal annars heilsusamlokum,“ segir Árni Pétur Jónsson, framkvæmdastjóri 10-11, sem á rekstur Dunkin Donuts á Íslandi. Þá verði til sölu heitir og kaldir drykkir sérstaklega fyrir börn.

Lækkun sykurskatts hafði ekki áhrif

„Í framtíðinni reiknum við með því að opna staði í 10-11 og hjá bensínstöðvum Skeljungs. Þetta mun ekki hafa áhrif á önnur vörumerki 10-11,“ segir hann.

Að sögn Árna Péturs hafði afnám á vörugjöldum á sykruð matvæli ekki áhrif á komu Dunkin Donuts til Íslands, en með þeim lækkaði skattur á sykur um 210 krónur.

„Afnám sykurskattsins hafði ekki afgerandi áhrif á ákvörðun okkar enda er þetta búið að vera nokkurra ára ferli að fá Dunkin Donuts til Íslands,“ segir Árni Pétur.