Danskt varðskip eltir grænlenskan togara í tengslum við leitina að Birnu

Íslensk stjórn­völd hafa óskað eftir aðstoð frá danska sjó­hernum í tengslum við leit­ina að Birnu Brjáns­dóttur. Þetta segja heim­ildir Stund­ar­innar en sam­kvæmt þeim hefur nú dönsku varð­skipi verið stefnt að græn­lenska tog­ar­anum Polar Nanoq sem fór frá Hafn­ar­fjarð­ar­höfn á laug­ar­dags­kvöldið.

Talið er að græn­lenskir skip­verjar um borð teng­ist rauðri Kia Rio-bif­reið sem lög­reglan hefur leitað að í tengslum við hvarf Birnu aðfara­nótt laug­ar­dags. Eiga þeir að hafa leigt bif­reið af sömu teg­und af Bíla­leigu Akur­eyrar á föstu­deg­inum og skilað henni á laug­ar­deg­inum. Togarinn fór síðan úr höfn eins og áður segir á laug­ar­dags­kvöld.

Skip­stjór­inn á Polar Nanoq stað­festir í sam­tali við Stundina að skipið sé nú á leið til Íslands.

Sigl­inga­leið græn­lenska tog­ar­ans Á vefnum MarineTraffic.com má fylgj­ast með skipa­um­ferð víða um heim. Ef litið er á græn­lenska togar­ann Polar Nanoq kemur í ljós að vef­ur­inn stað­setur skipið síð­ast fyrir þrettán klukku­tímum. Hér má sjá sigl­inga­leið skips­ins frá því það lagði frá Hafn­ar­fjarð­ar­höfn á laug­ar­dags­kvöldið.

Nákvæm staðsetning ekki fyrir hendi

Danska varð­skipið HDMS Triton nálg­ast nú græn­lenska togar­ann. Ekki er vitað um nákvæma stað­setn­ingu tog­ar­ans eða varð­skips­ins eða hvort þeir hafi yfir höfuð náð sam­bandi við græn­lensku áhafn­ar­með­lim­ina. Ef litið er á vef­inn MarineTraffic.com sem heldur utan um skipa­um­ferð víða um heim má sjá að vef­ur­inn stað­setur græn­lenska togar­ann síð­ast fyrir rúmum þrettán klukku­tímum en þá stefndi það hrað­byri á græn­lenska lög­sugu.

Þess ber að geta að lög­reglan telur að skór sem fund­ust í Hafn­ar­fjarð­ar­höfn séu skórnir sem Birna gekk í kvöldið sem hún hvarf.