Bjarni Benediktsson, formaður Sjálfstæðisflokksins, telur eðlilegt að skattbyrði lágtekju- og millitekjuhópa hafi aukist á kjörtímabilinu í ljósi þess að laun hafi hækkað. Hann gerir ekki athugasemd við að skattbyrði þeirra tekjuhæstu hafi minnkað á sama tíma jafnvel þótt tekjur þess hóps hafi hækkað mest.
Bjarni birti Facebook-færslu í gærkvöldi þar sem hann bregst við fréttaflutningi Stundarinnar og umfjöllun Indriða H. Þorlákssonar, fyrrverandi ríkisskattstjóra, um aukna skattbyrði lágtekju- og millitekjuhópa á yfirstandandi kjörtímabili.
„Þessi umræða er með því daprasta sem ég hef séð lengi,“ skrifar Bjarni og bendir á að tekjuskattsprósentan hafi vissulega verið lækkuð í tíð ríkisstjórnarinnar. „Það er sama hvaða tekjur þú hefur, tekjuskatturinn hefur lækkað í tíð þessarar ríkisstjórnar. Við höfum lækkað lægsta þrepið og afnumið miðþrepið. Fyrir langflesta hefur tekjuskatturinn lækkað um 3,3 prósentustig.“
Þá fullyrðir Bjarni að þess sé „hvergi getið að meginástæðan fyrir því að nær allar tekjutíundir greiða hærra hlutfall af launum í skatt, þrátt fyrir lægri tekjuskatt, er einföld: Launin hafa hækkað verulega“.
Í umfjöllun Stundarinnar var hins vegar skýrt tekið fram að þróun skattbyrðinnar hefði að miklu leyti ráðist „af þróun verðlags og launa og eftir atvikum af breytingum á tekjustiganum, en jafnframt af brottfalli auðlegðarskatts og auknu vægi fjármagnstekna sem skattlagðar eru minna en launatekjur“.
Indriði H. Þorláksson bendir einnig á það í grein sinni að aukin skattbyrði geti stafað af hækkun launa; sú hafi að vissu leyti verið raunin í stjórnartíð Sjálfstæðisflokksins og Framsóknarflokksins í kringum aldamótin. „Það er að hluta tæknilega rétt, en skýrir ekki af hverju ekki var brugðist við og komið í veg fyrir hækkun skatta og einkum því að þeir lendi í meira mæli á lágum tekjum en háum,“ skrifar Indriði sem telur að hafa þurfi í huga að afleiðingar skattkerfis eru að vissu leyti undir ytri aðstæðum komnar sem ekki eru alltaf fyrirséðar svo sem þróun í verðlagsmálum og launum. „Þau áhrif geta breytt skattbyrði og dreifingu hennar án breytinga á lögum en ætla verður að stjórnmálamenn séu meðvitaðir um þessi áhrif og bregðist við þeim eftir því sem tilefni er til,“ skrifar hann.
Bjarni skrifar: „Hin raunverulega frétt er ekki sú að skattbyrði allra tekjutíunda sé að vaxa. Fréttin er: allir hafa mun hærri laun.“
Eins og Stundin hefur áður greint frá jókst skattbyrði beinna skatta hjá 80 prósentum framteljenda á tímabilinu 2012 til 2015 en hjá tekjuhæstu 20 prósentunum minnkaði skattbyrðin. Ljóst er að launahækkanir geta ekki skýrt lægri skattbyrði tekjuhæstu 20 prósentanna.
Ríkisfjármál
Jökull Sólberg Auðunsson
Forsendur þjóðarsjóðs enn veikari en áður
Jaðarskattar lágtekjufólks miklu hærri á Íslandi en í öðrum OECD-ríkjum
Vilja létta 1200 milljónum af fjármagnseigendum með breyttum skattstofni
Andrés og Rósa gagnrýna að fé sé flutt frá þróunarsamvinnu til NATO-starfsemi
Fjármálaáætlun samþykkt: Bæta kjör öryrkja minna en til stóð vegna niðursveiflunnar
Athugasemdir