Tvær íslenskar konur, Björk Vilhelmsdóttir, fyrrverandi borgarfulltrúi, og Tinna Eyberg, voru í morgun handteknar af ísraelskum yfirvöldum í þorpinu Burin á Vesturbakkanum í Palestínu. Þær Björk og Tinna voru við ólífutínslu í þorpinu á vegum Alþjóða friðarstarfs kvenna í Palestínu. Ásamt þeim voru tvær franskar konur, sem einnig voru á svæðinu sem sjálboðaliðar, handteknir.
Sveinn Rúnar Hauksson, læknir og eignmaður Bjarkar, greindi frá þessu í morgun á Facebook. Þær Björk og Tinna voru handteknar á níunda tímanum að íslenskum tíma og hringdi Björk sjálf í Svein Rúnar til að segja honum frá stöðu mála. „Ég hef ekki heyrt í henni aftur, ég hef líka ekki reynt því ég vildi ekki trufla. Hún hefur þurft að heyra í ýmsum líka ef tækifæri hefur gefist, borgaraþjónustu utanríkisráðuneytisins og konsúl okkar Íslendinga á svæðinu,“ sagði Sveinn Rúnar í samtali við Stundina. Þess ber að geta að Björk svaraði ekki þegar Stundin reyndi að hringja í hana í morgun.
Björk og Tinna hafa verið í Palestínu til að veita það sem kallað er verndandi viðveru, það er að vera til staðar og aðstoða íbúa Palestínu á þeim svæðum þar sem gera má ráð fyrir afskiptum ísraelskra yfirvalda eða ísraelskra landtökumanna. Þær hafa aðstoðað við olífutínslu og á dögunum urðu þær meðal annars vitni að alvarlegu ofbeldi ísraelskra landtökumanna á hendur Palestínumönnum, í nágrenni landtökubyggðarinnar Yitzhar. Þar var bæði kveikt í olífutrjám svo yfir þúsund þeirra eyðilögðust í eldinum og einnig var ráðist á fólk sem var við ólífutínslu.
„Þetta eru engir mömmustrákar svo sem og við höfum lent í því að vera sett í niðurlægjandi aðstæður og setið undir hótunum“
Sveinn Rúnar segir að það hafi kannski verið viðbúið að eitthvað af þessu tagi myndi koma upp enda ísraelsk yfirvöld, herinn og landamæralögreglan með mikla viðveru á svæðinu og hafi áður haft afskipti af sjálfboðaliðunum og Palestínumönnum. „Í þessu tilviki er aðaláhyggjuefnið hvort að þær hafi aðeins verið teknar í hald eða hvort að þær hafi verið formlega handteknar, sem gæti leitt til málatilbúnaðar og brottvikningar frá Ísrael. Það hefur ítrekað komið fyrir konur úr þessum hópi.“
Sveinn Rúnar segir að Björk hafi borið sig vel og hún hafi verið í á leið inn til Ariel, landtökuborgar á hertekna svæðinu á Vesturbakkanum. „Þetta eru engir mömmustrákar svo sem og við höfum lent í því að vera sett í niðurlægjandi aðstæður og setið undir hótunum. Ég hef ekki svo miklar áhyggjur af því að hún verði beitt ofbeldi en mögulega mun hún sitja undir einhvers konar hótunum. En hún er sterk og stendur undir því.“
Athugasemdir