„Hann hefur verið að hugsa um að maka sinn krók og er slétt sama um kröfuhafa, það er ekki flóknara en það.“ Þetta segir Skúli Gunnar Sigfússon, oftast kenndur við Subway, um Svein Andra Sveinsson lögmann vegna niðurstöðu héraðsdóms í máli gjaldþrota félags síns EK1923 ehf.

Mbl.is greindi frá því í dag að Sveini Andra, skiptastjóra þrotabús EK1923, væri skylt að endurgreiða búinu alla þóknun sem hann hefur ráðstafað til sín af eignum búsins þar sem honum hafi skort til þess heimild. Héraðsdómur komst að þessari niðurstöðu eftir aðfinnslur minnihluta kröfuhafa sem Heiðar Ásberg Atlason, lögmaður þeirra og Skúla, fer fyrir. Upphæðin nemur um 100 milljónum króna og er ákvörðun héraðsdóms ekki kæranleg til æðra dómstigs.

Kröfuhafarnir fóru einnig fram á það að Sveini Andra yrði vikið sem skiptastjóra, en ekki var fallist á það þar sem stutt er í að skipti klárist. Ekki hefur verið skorið úr stærsta dómsmáli sem tengist skiptunum fyrir Landsrétti. Sveinn Andri innheimti 49.600 krónur á klukkustund með virðisaukaskatti fyrir stóran hluta vinnunnar.

„Þetta er í samræmi við það sem ég átti von á enda er maðurinn búinn að fara offari í gjaldtöku úr þessu þrotabúi, eins og ég hef bent á í greinum,“ segir Skúli, sem hefur gagnrýnt Svein Andra harðlega í málinu. „Dómarinn greinilega sendir skýr skilaboð inn í lögfræðistéttina að svona sjálftaka verði ekki liðin. Svona sjálftaka á fjármunum annarra gengur ekki upp.“

Skúli segir að niðurstaða Landsréttar í málinu muni skýra hversu mikið kröfuhafar fá úr búinu. „Það fer eftir dómi Landsréttar í stóra fasteignamálinu sem er eftir. Það veltur allt á því hvort Sveini Andra tekst að láta mig borga tvisvar fyrir sömu fasteignina, sem kostaði á 1.500 milljónir. Út á það gengur málið og hann náði fram dómi á óskiljanlegan hátt í héraðsdómi. Ef honum tekst það líka í Landsrétti munu þeir fá meira. En reyndar ef hann tapar, með því að þóknunin hans hafi lækkað er möguleiki á að kröfuhafar fái þó eitthvað eins og þeir hefðu átt að fá í byrjun ef allt hefði verið eðlilegt. Hann hefur verið að hugsa um eigin hag frá byrjun, ekki hag kröfuhafa.“