Tyrkneski herinn mun að líkindum auka ítök sín í Norður-Sýrlandi og ráðast gegn hersveitum Kúrda eftir kúvendingu frá Donald Trump Bandaríkjaforseta í gær. Haukur Hilmarsson er sagður hafa látist í slíkum hernaði í fyrra þar sem hann studdi sýrlenska Kúrda í baráttu við hryðjuverkasamtökin ISIS.

Bandarísk stjórnvöld tilkynntu í gærkvöldi um meiriháttar stefnubreytingu gagnvart hernaðaraðgerðum Tyrkja í Norður-Sýrlandi. Eftir símtal við Recep Erdogan, forseta Tyrklands, hefur Trump ákveðið að draga herlið sín frá svæðinu, þar sem þau hafa í samvinnu við hersveitir sýrlenskra Kúrda hrakið ISIS frá svæðinu. Tyrkir líta á sveitir Kúrda sem hryðjuverkahópa og hafa lengi beitt sér fyrir því að Bandaríkin hætti stuðningi sínum við þær.

Hinn 6. mars 2018 bárust fréttir þess efnis að Haukur Hilmarsson hefði fallið í árás Tyrklandshers á Afrin-hérað í Norðvestur-Sýrlandi, en þangað var Haukur kominn til að leggja Rojava-byltingu sýrlenskra Kúrda lið. Mikil óvissa ríkir um afdrif hans og hafa vinir og fjölskylda ekki fengið svör um hvað raunverulega átti sér stað.

Í norðurhluta Sýrlands hafa íbúar stofnað til sjálfstjórnarríkis innan Sýrlands, sem kallað er Rojava. Stjórnarskrá ríkisins var samþykkt 2014 og vakti hún athygli fyrir áherslur á trúfrelsi, jafnrétti kynjanna, réttindi minnihlutahópa og beint lýðræði.

Hersveitir Kúrda á svæðinu kallast SDF og innihalda meðal annars hersveitina sem Haukur gekk til liðs við. Með stuðningi Bandaríkjahers hefur SDF tekist að sigra ISIS-hópa í Rojava, auk annarra hópa íslamista tengda Al-Qaeda og sýrlenska hópa sem studdir eru af Tyrkjum. Tyrknesk stjórnvöld telja hersveitirnar vera tengdar kúrdíska verkamannaflokknum PKK sem barist hefur fyrir sjálfstæði Kúrdistan og er skilgreindur sem hryðjuverkahópur af NATO.

Í tilkynningu frá Hvíta húsinu kemur einnig fram að stjórnvöld hafi þrýst á Frakkland, Þýskaland og önnur Evrópuríki að taka aftur við ISIS hermönnum sem komu þaðan upphaflega, en að slíku hafi verið neitað. Bandaríkin muni ekki halda þeim fangelsuðum á kostnað skattborgara og því verði þeir afhentir tyrkneskum yfirvöldum, sem verði ábyrg fyrir öllum þeim sem handsamaðir voru síðustu tvö ár í átökunum.