Þorsteinn Pálsson, fyrrverandi forsætisráðherra, veltir því upp hvort Bandaríkin geti enn talist vera náinn bandamaður Íslands eftir að Donald Trump var kjörinn forseti. „Nú finnst flestum að það sé tungubrjótur að tala um forseta Bandaríkjanna sem leiðtoga vestrænna gilda og frjálsra þjóða,“ skrifar hann í grein í Fréttablaðinu í dag.

Bendir hann á að nú sé hegðun Trump komin í norrænt samhengi og það snerti enn frekar við tilfinningum margra. „Fyrir skömmu gerði forseti Bandaríkjanna tilraun til þess að hafa áhrif á framgang réttvísinnar í Svíþjóð. Og nú sýnir hann Dönum klærnar fyrir þá sök að vilja ekki fara í fasteignaviðskipti með Grænland. Það er langt síðan erlendur þjóðhöfðingi hefur gengið jafn langt í að lítilsvirða norræn gildi,“ skrifar hann.

„Íslendingar eru í hópi þeirra þjóða sem mest tapa á þeim umbrotum öllum“

Þorsteinn segir ekki auðvelt að leiða persónu Trump hjá sér eða slá lítilsvirðingunni við grunngildi vestrænna þjóða upp í grín. „Nú róa Bandaríkin að því öllum árum að losa um efnahags- og viðskiptasamstarf Evrópu,“ skrifar hann. „Loforð um stórkostlegan efnahags- og viðskiptasamning við Breta hefur átt drjúgan þátt í því að draga þá út úr Evrópusambandinu og veikja það. Íslendingar eru í hópi þeirra þjóða sem mest tapa á þeim umbrotum öllum. Jafnvel þótt grunngildi norrænnar lýðræðishefðar séu í húfi þurfa Norðurlönd rétt eins og margar stærri þjóðir að horfa á samskipti við Bandaríkin af sjónarhóli raunsæis. En á einhverjum tímapunkti hlýtur þessi spurning að vakna: Hvað er náinn bandamaður?“