Bið eftir tíma hjá gigtarlækni er nú tveir til tólf mánuðir, mun lengri en viðmiðunarmörk Embættis landlæknis segja fyrir um. Slíkt getur haft í för með sér færniskerðingu og skert lífsgæði.
Embættinu höfðu borist ábendingar um málið og því var gerð úttekt á aðgengi að göngudeildarþjónustu vegna gigtarsjúkdóma fyrri hluta árs 2019. Til hliðsjónar var viðmið embættisins þar sem miðað er við að ásættanleg bið eftir tíma hjá sérfræðingi sé 30 dagar.
„Aðgengi að þjónustu vegna gigtarsjúkdóma er misskipt milli landshluta og þörf er á að jafna það,“ segir í tilkynningu frá landlækni. „Ráðgjafarsími göngudeildar gigtar er mikilvægur stuðningur við starf lækna utan deildarinnar og jafnar þannig aðgengi og eykur gæði þjónustunnar en hlutverk deildarinnar í heildarskipulagi heilbrigðisþjónustu við gigtarsjúklinga er þó ekki nógu vel skilgreint.“
Í úttektinni komu einnig fram áhyggjur af stöðu barna með vefjagigt eða á vefjagigtarrófi. Telur embættið að skoða þurfi það sérstaklega. „Þá kom einnig greinilega fram að þörf er á heildstæðara skipulagi þjónustu við einstaklinga með gigtarsjúkdóma og skýrari verkaskiptingu til þess að efla flæði og samstarf milli veitenda þjónustunnar. Brýnt er að slík verkaskipting sé veitendum og notendum þjónustunnar kunn til að koma í veg fyrir óþarfa bið og sóun,“ segir í tilkynningunni.
Ábendingum embættisins hefur verið beint til heilbrigðisráðuneytisins, göngudeildar gigtar Landspítalans, sjálfstætt starfandi gigtarlækna og heilsugæslu.
Athugasemdir