Neytendasamtökunum berast enn ábendingar um innheimtu á smálánum sem bera meira en hæstu löglegu vexti, þrátt fyrir yfirlýsingar um annað.

„Enn er lántakendum neitað um sundurliðun á kröfum og innheimta ólögmætra lána heldur áfram,“ segir í yfirlýsingu frá samtökunum. „Það er stóralvarlegt að innheimtufyrirtæki í eigu lögmanns (og er því ekki undir eftirliti FME) skuli komast upp með að neita að afhenda gögn um stöðu lántakenda sem í einhverjum tilfellum sýna að fólk er löngu búið að greiða upp sína skuld. En til þess er jú leikurinn gerður“

Gísli Kr. Björnsson, lögmaður og stjórnandi Almennrar innheimtu, sagði við Fréttablaðið á dögunum að fyrirtækið sé hætt að innheimta lán sem eru með yfir 53,75 prósent vöxtum. „Það eru engin eldri lán í innheimtu,“ sagði Gísli. 

Neytendasamtökin segjast hafa dæmi undir höndum þar sem lántakandi var búinn að greiða 750.000 meira en honum bar og átti að greiða um 400.000 til viðbótar. Þegar hann hafi gert kröfu á Almenna innheimtu um endurgreiðslu hafi fyrirtækið hætt frekari innheimtu og felldi niður kröfu sína.

„Neytendasamtökin telja fullreynt að höfða til samvisku Gísla Kr. Björnssonar lögmanns og eiganda Almennrar innheimtu ehf.“ segir í yfirlýsingunni frá samtökunum. „Mikilvægt er að Lögmannafélag Íslands rannsaki hið fyrsta hvort háttsemi lögmannsins kunni að stríða gegn lögum eða siðareglum LMFÍ. Þar sem félagið tekur ekki við kvörtunum Neytendasamtakanna eru lántakaendur sem standa í stappi við Almenna innheimtu ehf. hvattir til að senda kvörtun á Lögmannafélag Íslands.“