Bæjarráð Ísafjarðar kallar eftir afstöðu Guðmundar Inga Guðbrandssonar, umhverfis- og auðlindaráðherra, og ríkisstjórnarinnar til fyrirhugaðrar sölu á eyjunni Vigur í Ísafjarðardjúpi. Grískur maður dróg nýlega kauptilboð sitt til baka, en eyjan hefur verið á söluskrá í rúmt ár.

Fjallað var um fyrirhugaða sölu á fundi bæjarráðs á mánudag og áskorunin samþykkt. „Bæjarráð undirstrikar vilja sinn til þess að ríkið kaupi Vigur og lýsi eftir afstöðu umhverfisráðherra við fyrri áskorun Ísafjarðarbæjar á umhverfisráðherra og ríkisstjórn Íslands um að kaupa eyjuna Vigur í Ísafjarðardjúpi,“ segir í fundargerð.

Salvar Baldursson, bóndi í Vigur, sagði á dögunum við BB.is að mörg kauptilboð hafi borist í eyjuna, en þeim hafi öllum verið hafnað. Kauptilboð gríska mannsins var hins vegar dregið til baka, meðal annars vegna reglna um sóttkví fyrir hunda þegar ferðast er inn og út úr landi, að sögn Davíðs Ólafssonar fasteignasala.

Ásett verð er 330 milljónir króna fyrir eyjuna í heild sinni fyrir utan minjar í eigu Þjóðminjasafnsins og sumarbústað í eigu ættingja. Í eyjuna koma um 10 þúsund manns á ári, en ferðamannatímabilið er frá lok maí fram í byrjun september. Daglegar skoðunarferðir eru í boði á sumrin. Um 30 þúsund lundapör verpa í eyjunni og er fuglalíf mikið, auk þess sem selir dvelja á skerjum allt árið.