„Líkamar kvenna eru dregnir inn í pólitíska umræðu með hætti sem ætti að heyra sögunni til og grafið er undan fyrri sigrum í baráttu kvenna fyrir yfirráðum yfir sínum eigin líkama.“ Þetta er á meðal þess sem fram kom í ræðu Katrínar Jakobsdóttur forsætisráðherra við opnun alþjóðlegrar ráðstefnu um kynjafræði í dag. 

„Bandalag öfga hægri flokka hefur valið sér marga óvini. Ráðist er gegn innflytjendum og minnihlutahópum og þeir gerðir að blórabögglum fyrir allt sem miður hefur farið í tengslum við hnattvæðingu og nýfrjálshyggju undanfarinna áratuga. Réttindum hinsegin fólks er víða ógnað, stundum í þeim tilgangi einum að ná til trúaðra kjósenda. Annað skotmark eru femínismi og kynjafræði, og kvenfrelsi almennt,“ sagði Katrín.

Hún lagði áherslu á að barist yrði gegn þessum öflum af öllum mætti og almenningi boðið upp á aðra valkosti. Þar væri alþjóðleg samvinna eina leiðin til að taka á stærstu áskorunum samtímans, svo sem loftslagsvandanum og vaxandi ójöfnuði. 

Fjallað er um málið á vef stjórnarráðsins en ráðstefnan er haldin af norræna tímaritinu NORA, ber yfirskriftina Border Regimes, Territorial Discourses and Feminist Politics og var skipulögð af RIKK, rannsóknarstofnun í jafnréttisfræðum, Jafnréttisskóla Háskóla Sameinuðu þjóðanna og EDDU, rannsóknasetri við Háskóla Íslands.