„Það er eins og þeir séu að reyna nýta sér það að ég er veik, að reyna að brjóta mig niður. Þeir eru að lemja á veikri manneskju sem hefur ekki orku í slaginn.“
Þetta segir Bára Halldórsdóttir í samtali við Stundina. Eins og fram kom í dag hefur lögmaður fjögurra þingmanna Miðflokksins farið fram á aukna gagnaöflun vegna hugsanlegs málareksturs vegna Klaustursmálsins og krafist upplýsinga um greiðslur inn á bankareikning Báru frá og með 15. nóvember til 15. desember 2018 auk frekara vöktunarefnis úr öryggismyndavélum Klausturbars og upplýsinga frá fjarskiptafyrirtækjum um smáskilaboð og símtöl til og frá Báru yfir tveggja daga tímabil.
Fyrri bréf lögmannsins sýna að Miðflokksmenn vilja peninga frá Báru, auk þess sem henni verði refsað og hún sektuð af Persónuvernd.
Bára segist vera orðin þreytt á kröfum þingmannanna og segir þær farnar að minna á lögreglurannsókn. Hún spyr hvað þingmönnunum gangi til; hvort þeir séu að reyna að dreifa athyglinni frá eigin háttsemi á Klaustri eða einfaldlega að gera sitt besta til að brjóta hana niður í hefndarskyni.
Heilsunni hefur hrakað
Þegar Bára fékk fréttir af nýjustu kröfum þingmannanna gagnvart henni hafði hún eytt nóttinni á slysa- og bráðamóttöku Landspítalans þar sem hún fékk verkjastillandi lyf.
Eins og fram kom í viðtali Stundarinnar við Báru þann 7. desember síðastliðinn, þar sem hún steig fram sem uppljóstrarinn á Klaustri, glímir hún við sjúkdóminn Behcet's, gigtarsjúkdóm sem leggst á æðakerfi líkamans. Sjúkdómurinn er mjög sjaldgæfur og aðeins sex Íslendingar eru greindir með hann. „Þetta er sjálfsónæmis- og gigtarsjúkdómur, ólæknanlegur og krónískur, og lýsir sér í stöðugum vöðvaverkjum, sáramyndun og bólgum,“ sagði Bára. „Stundum fer meltingarkerfið í klessu, stundum koma kviðverkir og magakrampi. Ég fékk einu sinni gerviheilahimnubólgu og allt er þetta auðvitað mjög streituvaldandi. Í rauninni er ég alltaf lasin, rúmliggjandi vikum og mánuðum saman og þarf að vera á sterkum lyfjum til að geta farið á stjá eða gert nokkurn skapaðan hlut.“
Þekkt er að álag getur kynt undir sjúkdómseinkennum Bechet's. Aðspurð hvort harkaleg viðbrögð þingmannanna gagnvart henni hafi haft áhrif á heilsuna svarar Bára játandi. „Ég er búin að vera veikari núna en ég var fyrir áramót. Þetta hefur líka haft áhrif á fjölskyldulífið og annað. Konan mín missti úr vinnu milli jóla og nýárs sem við höfum ekki efni á, til að geta sinnt mér,“ segir hún. „Þetta er orðið ágætis álag sem ég er undir og ég var undir miklu álagi fyrir, enda er ég með sjúkdóm sem gerir í því að drepa eða eyðileggja líkama minn,“ segir Bára sem bætir því við að hún viti aldrei hvað þingmennirnir taki næst til bragðs.
Undirbýr gjörning
Bára er staðráðin í því að leyfa þessu ekki að stoppa sig. Þessa daganna stendur hún fyrir söfnun á Karolina fund fyrir gjörningi sem verður framkvæmdur á sviðslistahátíðinni Fringe næsta sumar. Hún segir gjörninginn viðeigandi í samhengi við Klaustursmálið, enda hafi sú staðreynd að hún er öryrki tekið mikið pláss í umræðunni.
Bára segir fólk oft ekki trúa því eða skilja, þegar það sér hana á gangi, að hún sé veik. Sumir gangi jafnvel svo langt að halda því fram að hún sé að ímynda sér veikindin. „Ég er með sjúkdóm sem dregur úr mér alla orku og ég er í stöðugri lyfjameðferð við verkjum,“ segir Bára. Hún segir fólk halda að hún sé að svindla úr kerfinu bætur og fólk hafi jafnvel gengið svo að langt að reyna bjóða henni vinnu. „Á meðan sit ég heima og er að berjast við að eiga einhverja tvo til þrjá klukkutíma á dag mögulega í lagi ef ég er heppin.“
Athugasemdir