Lögreglan á höfuðborgarsvæðinu gefur engar upplýsingar um gang mála við rannsókn í tengslum við húsleitir á átta stöðum aðfararnótt laugardagsins síðasta. Meðal annars var gerð húsleit á skemmtistað í miðborginni, en Fréttablaðið greindi frá því í morgun að um væri að ræða skemmtistaðinn Shooters í Austurstræti, sem hefði verið innsiglaður. Rannsóknin snýr að umfangsmikilli brotastarfsemi að því er fram kom í tilkynningu frá lögreglu og er hún meðal annars unnin í samvinnu við skattrannsóknarstjóra. Samkvæmt heimildum Fréttablaðsins snýr málið meðal annars að skattalagabrotum, ætluðu mansali og milligöngu um vændi.
Í húsleitunum var lagt hald á gögn, búnað og fjármuni og höfð afskipti af 26 manns. Tíu þeirra voru færðir til yfirheyrslu á lögreglustöð en sleppt að yfirheyrslum loknum. Karl Steinar Valsson, yfirlögregluþjónn hjá miðlægri rannsóknardeild lögreglunnar á höfuðborgarsvæðinu, segir í samtali við Stundina að lögreglan sjái sér ekki fært að veita frekari upplýsingar að sinni heldur en þær sem fram komu í tilkynningu um helgina, vegna rannsóknarhagsmuna. „Það verður þannig í einhverja daga. Við erum bara að ná utan um ákveðna hluti. Ég er að vonast til að við getum greint frá fleiru undir lok vikunnar.“
Herraklúbbur rannsakaður vegna gruns um vændisstarfsemi
Karl Steinar vildi ekki staðfesta að um skemmtistaðinn Shooters væri að ræða og ekki heldur hvers kyns brotastarfsemi væri til rannsóknar. Hins vegar hefur Shooters æði oft verið umfjöllunarefni fjölmiðla á umliðnum árum vegna vafasamrar starfsemi. Þannig greindi Stundin frá því árið 2015 að skemmtistaðurinn væri til rannsóknar lögreglu vegna gruns um milligöngu með vændi.
Shooters Coyote Club gefur sig út fyrir að vera herraklúbbur eða gentlemen's club upp á ensku. Í lýsingu á heimasíðu staðarins segir að hann bjóði upp á hið besta sem finna megi í Reykjavík þegar kemur að fullorðinsskemmtun, „Adult Entertainment“ en það orðalag er almennt notað um kynlífsiðnað af ýmsu tagi. Tiltekið er að á starfsmenn staðarins séu hinir fallegustu og að þar starfi æsandi dansarar, auk þess sem staðurinn bjóði upp á einakaherbergi.
„Ég er að vonast til að við getum
greint frá fleiru undir lok vikunnar“
Af myndum á heimasíðu staðarins að dæma eru dansarar þar léttklæddir. Samkvæmt lögum um veitingastaði, gististaði og skemmtanahald er hvorki heimilt að bjóða upp á nektarsýningar né með öðrum hætti að gera út á nekt starfsmanna eða annarra sem á skemmtistöðum eru.
Í fréttum Stundarinnar árið 2015 var því lýst hvernig fáklæddar konur gengu um staðinn þegar blaðamaður heimsótti hann. Þá var rætt við heimildarmann sem lýsti því að stundaður væri nektardans á efri hæð staðarins og borgað væri fyrir slíkan dans með rándýrum drykkjum. Þá var því lýst hvernig erlendar konur sem störfuðu á staðnum voru sóttar í hús í Teigunum á kvöldin og þær keyrðar þangað aftur á nóttinni, fáklæddar að sögn nágranna.
Vafasamur ferill
Sé leitað á vefnum eftir skemmtistaðnum Shooters koma upp fjöldinn allar af niðurstöðum en nokkrar vekja meiri athygli en aðrar. Meðal annars er staðurinn nefndur á síðunni brothel-in.com, síðu sem gefur sig út fyrir að halda skrá yfir vændishús og kynlífsklúbba um heim allan. Þá greindi DV frá því í ársbyrjun 2016 að lögblindur Bandaríkjamaður hefði kært eigendur Shooters fyrir að hafa gjaldfært tæpar þrjár milljónir út af kreditkortum hans þegar hann var að skemmta sér á staðnum sumarið 2015. Stærsta færslan hljóðaði upp á 980 þúsund krónur.
Næst ekki í eigendur og rekstraraðila
Rekstrarfélag Shooters er félagið Kfk ehf. sem einnig er sagt, í ársreikningi fyrir árið 2017, reka annað sem tengist slíkr starfsemi „ásamt því að koma listamönnum á framfæri“. Rekstartekjur ársins 2017 námu samkvæmt ársreikningi rúmum 345 milljónum króna og var hagnaður fyrir skatta tæpar tvær milljónir króna. Hagnaður ársins var hins vegar nokkru minni en svo, þar sem félagið mátti greiða 600 þúsund krónur í fjársektir, en ekki kemur fram hverju þær sektir sættu. Það er þó ekki í fyrsta skipti sem félagið þarf að greiða fjársektir því árið áður, 2016, námu fjársektir á félagið krónum 250 þúsund. Eignir félasins námu tæpum 42 milljónum króna, að langmestu leyti fólgnar í skammtímakröfum sem námu um 33,5 milljónum króna. Handbært fé nam rúmum 7 milljónum króna.
Eini eigandi Kfk ehf. og þar með Shooters, samkvæmt fyrirtækjaskrá, er Þórdís Elva Guðmundsdóttir. Stundin náði ekki sambandi við hana við vinnslu fréttarinnar. Stundin gerði þá einnig tilraun til að ná sambandi við Kristján Georg Jósteinsson, sem verið hefur framkvæmdastjóri staðarins, en símanúmer sem reynt var að hafa samband við hann í gegnum reyndist lokað.
Athugasemdir