G

unnar Bragi Sveinsson, þingmaður Miðflokksins og fyrrverandi utanríkisráðherra, gantaðist með það á Klaustri Bar að Ragnheiður Runólfsdóttir, afrekskona í sundi, hefði orðið fyrir heimilisofbeldi.

Magnús Þór Hafsteinssonframkvæmdastjóri þingflokks Flokks fólksins

Mynd: Flokkur fólksins

„Já sunddrottninguna já, voruði að lemja hana?“ segir hann á hljóðupptökunni sem Stundin hefur undir höndum og skellir upp úr. 

Ragnheiður steig fram í viðtali við Akureyri Vikublað í október 2017 og opnaði sig um heimilisofbeldi sem hún segist hafa orðið fyrir af hendi barnsföður síns og sambýlismanns til margra ára, Magnúsar Þórs Hafsteinssonar. 

Magnús Þór, fyrrverandi þingmaður Frjálslynda flokksins sem í dag er framkvæmdastjóri þingflokks Flokks fólksins, vísaði ásökunum á bug í fyrra og kvartaði undan því sem hann kallaði „gróft netníð“.

Á Klausturssamkomu þingmannanna sex var rætt um málið á léttu nótunum:

Bergþór: „Sá sem lemur Röggu Run, hann á ekki séns á Vesturlandi.“

Anna Kolbrún: „Ég veit það. Veistu, ég er sammála þér, ég skil ekkert í ykkur.“

Gunnar Bragi: „Ha? Sá sem lemur Röggu Run? Hver er það?“

Bergþór: „Já.“

Gunnar Bragi: „Já sundkellingin þarna, voruði að lemja hana? Hahahahahaha!“ 

Bergþór: „Maggi gerði það sko.“

Stundin hafði samband við Ragnheiði Runólfsdóttur við vinnslu fréttarinnar og greindi henni frá þessum orðaskiptum. Hún vildi ekki tjá sig um málið að svo stöddu.

Ofbeldisfullt orðfæri um Lilju Alfreðsdóttur

Stundin hefur fjallað með ítarlegum hætti um þá kvenfyrirlitningu sem birtist í samskiptum þingmannanna á Klaustri Bar. Eins og fram hefur komið kallaði Bergþór Ólason, þingmaður Miðflokksins, Ingu Sæland, formann Flokks fólksins, „húrrandi klikkaða kuntu“ auk þess sem þingmennirnir göntuðust með að það væri eðlilegt að kona sem væri ekki jafn „hot“ og áður yrði látin gjalda fyrir það í prófkjörum. „Það fellur hratt á hana,“ sagði Bergþór um Írisi Róbertsdóttur, bæjarstjóra í Vestmannaeyjum. 

„Þú getur riðið henni skilurðu“

Þá töluðu karlarnir í Miðflokknum með ógeðfelldum hætti um Lilju Alfreðsdóttur, mennta- og menningarmálaráðherra. „Hjólum í helvítis tíkina!“ sagði Gunnar Bragi. „Fuck that bitch,“ sagði Bergþór og bætti svo við: „Þú getur riðið henni skilurðu.“ Þá sagði hann: „Það hefur engin gugga teymt mig meira á asnaeyrunum en hún sem ég hef ekki fengið að ríða.“ Sigmundur Davíð sagðist vona að konan hans heyrði ekki til hans, en að hann hefði „alveg verið til í þetta dæmi“. Hins vegar hefði komið í ljós að Lilju væri ekki treystandi. „Og hún spilar á karlmenn eins og kvenfólk kann.“

UN Women: Gunnar Bragi hefur skaðað HeForShe

Í ráðherratíð sinni í utanríkisráðuneytinu vakti Gunnar Bragi heimsathygli fyrir þátttöku sína í He for She átakinu um kynjajafnrétti. „Hingað til hefur umræðan verið í höndum kvenna. En til þess að koma á varanlegum breytingum mega menn ekki vera fjarverandi frá umræðunni. Við karlmenn erum hluti af vandamálinu, en einnig hluti af lausninni,“ skrifaði Gunnar Bragi í grein sem birtist í The Guardian og leikkonan Emma Watson hældi.

Þá stóð Gunnar Bragi og ráðuneyti hans fyrir Rak­ara­stof­uráðstefnunni (e. Barbershop Conference) svokölluðu með Súrínam á þingi Sam­einuðu þjóðanna í New York þar sem markmiðið var að virkja karla í bar­átt­unni fyr­ir jafn­rétti kynj­anna.

UN Women á Íslandi sendi frá sér fréttatilkynningu á föstudag þar sem fram kom að með framgöngu sinni á Klaustri Bar hefði Gunnar Bragi skaðað orðspor HeForShe. Ummæli sem hann lét falla séu óásættanleg og staðfesti hve mikið verk er enn óunnið í baráttunni fyrir kynjajafnrétti á Íslandi.

Mynd: Framsóknarflokkurinn

Árið 2015 hlaut Gunn­ar Bragi jafn­réttisviður­kenn­ingu á flokksþing­i Framsóknarflokksins. „Viður­kenn­ing­in er veitt fyr­ir mikið og óeig­ingjarnt starf í þágu flokks­ins sem varðar að jafna stöðu karla og kvenna,“ sagði í fréttatilkynningu um málið. Á myndinni hér að ofan má sjá Önnu Kolbrúnu Árnadóttur, sem á þessum tíma var formaður Framsóknarkvenna, afhenda Gunnari Braga blómvönd.

„Ég taldi mér trú um að ég yrði að vera kyrr“

Mynd: Akureyri Vikublað

„Þetta var erfitt tímabil en ég held að ég að ég hafi komið út sterkari þótt það hafi tekið sinn tíma,“ sagði Ragnheiður Runólfsdóttir, fyrrverandi sunddrottning í viðtalinu við Akureyri vikublað síðasta haust.

„Ef ég horfi til baka sé ég viðvörunarbjöllurnar sem dingluðu, strax í upphafi og út sambandið, en ég hlustaði ekki á þær. Ég vildi ekki ganga aftur í gegnum skilnað og fannst ég þurfa að standa mína plikt; að ég ætti ekki að gera mikið úr þessu, standa mig, vinna, koma börnunum út í heiminn og vera ánægð með mitt. Ég hafði allt – góða vinnu, frábæra fjölskyldu, húsnæði og yndisleg börn og fannst að ég hlyti að geta verið ánægð. Ég taldi mér trú um að ég yrði að vera kyrr, en smám saman gerði ég mér grein fyrir að ég vildi það ekki og ég sé ekki eftir þeirri ákvörðun.“