Sigmundur Davíð Gunnlaugsson, formaður Miðflokksins, tilkynnti Miðflokksmönnum með tölvupósti í dag að Gunnar Bragi Sveinsson og Bergþór Ólason, þingmenn flokksins, væru „komnir í leyfi“, samkvæmt heimildum Stundarinnar.

Gunnar Bragi og Bergþór fóru báðir hörðum orðum um kvenkyns stjórnmálamenn á upptöku sem Stundin hefur undir höndum. Sjálfur sagði Sigmundur Davíð að stjórnmálakona mundi „hrynja niður“ lista út af útliti sínu. Þá talaði hann af hörku um Lilju Alfreðsdóttur, mennta- og menningarmálaráðherra. „Henni er ekki treystandi og hún spilar á karlmenn eins og kvenfólk kann,“ sagði Sigmundur Davíð.

Þá staðfesti Sigmundur Davíð orð Gunnars Braga um von á persónulegu endurgjaldi frá Sjálfstæðisflokknum fyrir að skipa Geir H. Haarde sem sendiherra í Bandaríkjunum.

Sátu þeir, Sigmundur Davíð, og Anna Kolbrún Árnadóttir og ræddu málin á Klaustri Bar þann 20. nóvember síðastliðinn ásamt Karli Gauta Hjaltasyni og Ólafi Ísleifssyni, þingmönnum Flokks fólksins. Orðaskiptin voru mjög hávær, áttu sér stað í vitna viðurvist og náðust að hluta á upptöku.

Þá hefur Halldór Gunnarsson, stjórnarmaður í Flokki fólksins staðfest við RÚV að Ólafi og Karli Gauta, þingmönnum flokksins, hafi verið vikið úr flokknum. Ákvörðunin um brottreksturinn var tekin á stjórnarfundi rétt í þessu. Báðir munu þó áfram sitja á þingi, nema þeir sjálfir ákveði að víkja.

Sigmundur Davíð hefur ótal sinnum setið sambærilegar umræður

Í tölvupósti til flokksmanna sinna segist Sigmundur Davíð alinn upp  við að sýna einstaklingum virðingu og hafa reynt að forðast persónuníð. „Ljóst er að ég hefði átt að stöðva fyrrnefnt samsæti þegar það þróaðist með þeim hætti sem það gerði,“ skrifar hann. „Sem formaður flokksins var það mitt að gera það frekar en annarra. Ég skammast mín fyrir að hafa ekki gert það en sök mín hvað þetta varðar er því miður miklu meiri en nemur þessum eina fundi.“

Sigmundur Davíð segist oft hafa setið slíkar samræður án þess að stöðva þær og gerir lítið úr því að þær tengist kyni fólksins sem þar á í hlut eða flokksaðild. „Ég hef hlustað á þingmenn flestra flokka úthúða flokksfélögum sínum og nota orðbragð sem í sumum, jafnvel mörgum, tilvikum er enn grófara en það sem birst hefur að undanförnu. Þingmenn af báðum kynjum eiga þar í hlut og fórnarlömbin eru auk þess af báðum kynjum.“

Hann segir það sem sagt sé í einkasamræðum afmarkaðs hóps annars eðlis en það sem sagt er opinberlega. „Mér hefur þótt það til marks um einstaka hræsni þegar fólk sem maður hefur ítrekað heyrt segja hreint út sagt ógeðfellda hluti um félaga sína og grófustu brandara sem ég veit um stígur nú fram uppfullt af vandlætingu. Það að aðrir hagi sér með þessum hætti afsakar að sjálfsögðu ekki einu slíku umræðurnar sem urðu opinberar eða þá þingmenn sem tóku þátt í þeim. Þó er mikilvægt að setja þetta í samhengi ef við ætlum raunverulega að laga þetta ástand.“

Hann segir að ætlunin hafi ekki verið að meiða. „Þingmennirnir Gunnar Bragi Sveinsson og Bergþór Ólason áforma að taka sér leyfi frá störfum,“ segir í póstinum til Miðflokksmanna. „Iðrun þingmanna er mikil og einlæg og ég vona að þið getið með tímanum séð ykkur fært að veita fyrirgefningu.“