Átta félags­menn í Sjó­manna­fé­lagi Íslands lýsa yfir van­trausti á stjórn félags­ins sem þeir segja að fari nú með ein­ræði í félag­inu. Jónas Garð­ars­son, sitj­andi for­maður félags­ins, hafn­aði í gær kröfu átt­menn­ing­anna um félags­fund vegna þeirrar alvar­lega stöðu sem komin væri upp í félag­inu. Fullyrti Jónas að ein­ungis 52 af þeim 163 sem skrifað hefðu undir áskorun til stjórn­ar­innar um að boða til slíks fundar væru í raun og sanni félagar í Sjó­manna­fé­lagi Íslands. Átt­menn­ing­arnir óska nú eftir því að fá að sjá lista yfir það hverjir séu félags­menn í Sjó­manna­fé­lagi Íslands í ljósi þess að óháður aðili var ekki feng­inn til þess að bera félaga­list­ann saman við und­ir­skrift­ar­list­ann.

„Það hefur ekki farið fram hjá neinum að mikil ólga er innan félags­ins svo líkja mætti því við skip sem hefur fengið á sig brot­sjó,“ segir í til­kynn­ingu átt­menn­ing­anna en þeir líkja félagi sínu við „sökkvandi skip eftir að rangar ákvarð­anir hafa verið teknar við björgun, af þeim sem stjórna.“ Þá gagn­rýna þeir að krafa fjög­urra félaga um að vísa Heið­veigu Maríu Ein­ars­dóttur úr félag­inu hafi fengið áheyrn og hljóm­grunn á meðan krafa þeirra átta og fleiri félaga hafi verið algjör­lega hunsuð. „Að 4 félags­menn geti farið fram á að einum félaga sé vikið úr félag­inu en 8 félags­menn, sem eru hér und­ir­rit­aðir, geti ekki óskað eftir almennum félags­fundi lætur okkur líða eins og við séum ekki með rödd í okkar eigin félagi.“

„Verður okkur sem nú höfum gagn­rýnt for­yst­una, þó ekki með þessum orðum, vikið úr félag­inu?“

Félags­menn­irnir vísa í til­kynn­ingu for­manns Sjó­manna­fé­lags Íslands frá því í gær þar sem fram kom að Heiðveig María hefði gagn­rýnt for­ystu félags­ins harka­lega í fjöl­miðlum og borið æru­meið­andi ásak­anir upp á stjórn­ina. Þá spyrja þeir hvort þeir geti sjálfir búist við því að verða gerðir brott­rækir úr félag­inu fyrir gagn­rýni sína. „Verður okkur sem nú höfum gagn­rýnt for­yst­una, þó ekki með þessum orðum, vikið úr félag­inu?“ Þá ítreka þeir að Heiðveig María standi ekki á bak við und­ir­skrift­ar­list­ann, „en eftir við­brögð for­manns og stjórnar félags­ins sein­ustu vikna sjáum við okkur ekki fært að styðja þá stjórn sem nú fer með ein­ræði í félag­inu.“

Fjöl­margir hafa gagn­rýnt for­ystu Sjó­manna­fé­lags Íslands fyrir fram­göngu sína gagn­vart Heiðvigu Maríu að und­an­förnu. Þannig for­dæmdi Drífa Snædal, for­seti ASÍ, það sem hún kall­aði aðför að Heið­veigu. Þá hafa for­ystu­menn helstu stétt­ar­fé­laga lands­ins einnig gagn­rýnt for­mann­inn og for­yst­una harð­lega.