Drífa Snædal, nýkjörinn forseti Alþýðusambands Íslands, ASÍ, fordæmir Sjómannafélag Íslands fyrir það sem hún kallar aðför að Heiðveigu Maríu Einarsdóttur, sjómanni og viðskiptalögfræðingi. Heiðveigu var í fyrradag vikið úr félaginu  en hún hugðist sækjast eftir embætti formanns þess.  Forseti ASÍ segir mjög alvarlegt mál að víkja fólki úr stéttarfélagi og svipta fólk réttindum sínum.

„Eftir að hafa fylgst með ótrúlegri aðför formanns Sjómannafélags Íslands að Heiðveigu Maríu Einarsdóttir og þeim skilyrðum sem félagsmenn þurfa að uppfylla til að geta gefið kost á sér í trúnaðarstöður get ég ekki á mér setið,“ segir Drífa í nýlegri stöðuuppfærslu á Facebook.

Hún tekur fram að þó Sjómannafélag Íslands sé ekki í Alþýðusambandi Íslands heldur sjálfstætt félag þá séu regnhlífarsamtök sjómanna innan ASÍ. „Ef félag innan ASÍ hegðaði sér með svipuðum hætti og Sjómannafélag Íslands gerir þá yrði gripið í taumana og almennir félagsmenn hefðu þá möguleika á að fara með málið áfram innan heildarsamtakanna.“

Drífa segir einn helsta ókostinn við að vera ekki innan heildarsamtakanna vera þann að engar félagslegar kæruleiðir séu til staðar. „Hvað með aðgengi að sjúkrasjóði, fræðslusjóði og orlofssjóði svo ekki sé talað um félagslegu starfi? Er verið að svipta hana áunnum réttindum og tryggingum? Ég vil hvetja farmenn og fiskimenn til að ganga til liðs við sjómannafélög og stéttarfélög sem eru innan Alþýðusambandsins og njóta þar með félagslegrar verndar sem heildarsamtök geta veitt.“