Íslenskir atvinnurekendur brjóta á þúsundum erlendra starfsmanna og ástandið er hunsað af yfirvöldum og samfélaginu. Þetta segir Halldór Grönvold, aðstoðarframkvæmdastjóri ASÍ.

Fjallað var um vinnumansal og slæma stöðu útlendinga á íslenskum vinnumarkaði í fréttaþættinum Kveik á RÚV í gær. Í viðtölum við útlendinga kom fram að margir hafa verið hlunnfarnir, látnir búa við slæmar aðstæður og verið fengnir til landsins á fölskum forsendum. Þá hafi sumir verið látnir vinna fyrir lægri laun en Íslendingar í sama starfi.

Halldór segir ekkert hafa komið á óvart í þættinum. „Þarna eru nokkur ágæt dæmi um þá einbeittu brotastarfsemi sem við sjáum viðgangast á íslenskum vinnumarkaði,“ sagði hann í viðtali við fréttastofu RÚV. „Það er mjög algengt að það sé verið að brjóta á þessum einstaklingum. Það er allt frá launaþjófnaði, bara klassískum, yfir í mjög einbeitta brotastarfsemi þar sem það er verið að vanvirða vinnuverndarreglur, okra á húsaleigu og taka alls konar gjöld af fólki. Og verstu tilfellin eru svo náttúrlega hreint mansal, því miður.“

Aldrei hafa fleiri útlendingar starfað á íslenskum markaði en nú. Tuttugu og fimm þúsund manns af öðrum þjóðernum vinna á Íslandi og hefur eftirspurnin verið mikil undanfarin ár. Þá hafa starfsmannaleigur aukið umsvif sín verulega.

„Það er lítill pólitískur áhugi eða skilningur á málinu,“ segir Halldór. „Það náttúrlega smitar þá inn í allt stjórnkerfið og síðan til alls almennings sem að einhvern veginn lokar svolítið augunum gagnvart þessari brotastarfsemi. Auðvitað eru til heiðarleg fyrirtæki á íslenskum vinnumarkaði, sem betur fer, en þetta er allt of algengt. Þetta er svona ómenning sem þessi erlendu fyrirtæki komu með inn hérna fyrst og íslensk fyrirtæki hafa verið að taka upp. Við erum ekki að tala um tugi, við erum ekki að tala um hundruð, við erum að tala um þúsundir einstaklinga sem er einfaldlega verið að fara illa með og brjóta á.“