Á laugardaginn kemur mun heimur íslenskra barnabóka taka neðri hæð Norræna hússins yfir, þegar sýningin Barnabókaflóðið verður opnuð. Sýningarstjórinn, Kristín Ragna Gunnarsdóttir, teiknari og rithöfundur, var í óða önn við undirbúning þegar blaðamaður Stundarinnar sló á þráðinn til hennar nokkrum dögum fyrir opnun. „Jú, hér er allt á fullu, verið að mála veggi og setja upp texta úr völdum barnabókum,“ segir hún, spurð hvort það sé enn í nógu að snúast í Norræna húsinu, svona skömmu fyrir opnun.

Á sýningunni verða meðal annars málaðar myndir á veggina eftir þá myndhöfunda sem verða gestir á Mýrinni, barnabókmenntahátíð Norræna hússins, sem tekur við af Barnabókaflóðinu. Ein þeirra er Sigrún Eldjárn, en hún og bróðir hennar, Þórarinn Eldjárn, verða heiðursgestir bæði sýningarinnar og Mýrarinnar, sem er viðeigandi þar sem bæði tvö hafa sett mark sitt á íslenskar barnabókmenntir svo um munar.

Jafnframt verða málaðir textar á veggina úr þeim bókum sem tilnefndar hafa …