Þingflokksformaður Framsóknarflokksins, Þórunn Egilsdóttir, segir meiru máli skipta að jarðir séu nýttar heldur en hvert eignarhaldið á þeim sé og hvort þær séu í eigu Íslendinga eða útlendinga. Nýta eigi jarðir til landbúnaðarframleiðslu og halda eigi landinu í byggð. Taka þurfi jarðakaup útlendinga upp á Alþingi í haust.

Þórunn sjálf býr á jörðinni Hauksstöðum í Vopnafirði. Tuttugu prósenta hlutur í Hauksstöðum er í eigu félagsins Grænaþings, sem aftur er að fullu í eigu Dylan Holding S.A. sem skráð er í Lúxemborg en ekki hafa fundist upplýsingar um eignarhald á því félagi. Hins vegar er Dylan Holding nátengt James Ratcliffe, breskum auðmanni sem hefur á undanförnum árum sópað til sín jörðum á Norðausturlandi.

Þórunn var í viðtali á Morgunvaktinni á Rás 1 í morgun þar sem meðal annars var rætt við hana um jarðakaup útlendinga hér á landi. Þórunn sagði þar að stefnu vantaði hvað varðar það að jarðir séu nýttar. Nýta ætti þær til landbúnaðar og matvælaframleiðslu og slíkt eigi að gilda jafnt um Íslendinga sem útlendinga.

Spurð sérstaklega að því hvort henni þætti í lagi að útlendingar kaupi hér jarðir svaraði Þórunn því til að auðvitað mættu Íslendingar ekki missa landið allt frá sér og selja það útlendingum. „En ég held að meginpunkturinn snúist um það hvernig við ætlum að nýta landið, það snýst algjörlega um það. Við ætlum að hafa landið í byggð, stunda hér matvælaframleiðslu og byggja jarðirnar en hafa landið allt blómlegt og uppbyggt. Ekki í því að drabbast niður og tún í órækt. Þá verða þær reglur að gilda að menn verða að sitja jarðirnar og búa á þeim.“ Aðspurð sagði Þórunn að taka ætti upp umræðu um jarðakaup útlendinga á Alþingi í haust.

Haukstaðir í fimmtungs eigu huldufélags í Lúxemborg

Hauksstaðir í Vopnafirði

Þórunn er sem fyrr segir búsett á Hauksstöðum í Vopnafirði ásamt manni sínum Friðbirni Guðmundssyni. Friðbjörn er skráður fyrir 41,67 prósenta hlut í Hauksstöðum, dánarbú Baldurs Guðmundssonar, bróður Friðbjarnar, á 21,66 prósent, og Jón Þór og Sigurbjörg Kristín Guðmundsbörn, systkini þeirra Friðbjarnar og Baldurs, eiga hvort um sig 8,33 prósent hlut í jörðinni.

Tuttugu prósenta hlutur í Hauksstöðum er í eigu Grænaþings sem er aftur í eigu Dylan Holding. Dylan Holding er skráð í Lúxemborg en ekki finnast upplýsingar um eignarhald á því félagi. Í stjórn Grænaþings situr Jóhannes Kristinsson, fjárfestir í Lúxemborg, sem á sömuleiðis fjölda jarða í Vopnafirði að hluta eða í heild. Dylan Holdings á sautján önnur félög að hluta eða í heild sem öll eiga hluta í jörðum á norðan og austanverðu landinu. Dylan Holding er nátengt félögum sem James Ratcliffe, breskur auðmaður sem hefur verið stórtækur í jarðakaupum á Norðausturlandi og Austurlandi undanfarin ár, á og eiga í fjölda jarða. Fjallað var ítarlega um jarðakaup Jóhannesar og Ratcliffe í Austurfrétt árið 2016.

Þannig á Ratcliffe 34 prósenta hlut í Veiðifélaginu Streng í gegnum félagið Fálkaþing sem er aftur í eigu Halicilla Limited Company, en Ratcliffe á það félag að fullu. Í Streng á Grænaþing 52,67 prósent hlut. Strengur á sex jarðir í Vopnafirði í heild eða að hluta. Fleiri jarðir eru í eigum beggja félaga og tengsl þeirra liggja all víða saman.