„Fólki sem líður illa getur alltaf fundið einhverja ástæðu til að mótmæla,“ segir Einar Hannesson, aðstoðarmaður Sigríðar Á. Andersen dómsmálaráðherra, í færslu sem hann birti á Facebook um hátíðarfund Alþingis á Þingvöllum í gær.
Einar segir það hafa spillt gleðinni „á þessum merkis tímamótum að sumir þurftu að vera með fílusvip og reyna að hleypa fundinum upp með alls kyns mótmælum út af mismunandi ágreiningsefnum.“ Þá spyr Einar hvort „ekki sé nóg komið af þessu 2008 rugli“.
Hátíðarhöldin féllu í skuggann af harðvítugum deilum vegna ræðuhalda Piu Kjærsgaard á þingfundinum, en Pia er forseti danska þingsins, fyrrverandi formaður Danska þjóðarflokksins og einn af frumkvöðlum skandinavísks þjóðernispopúlisma. Hún er þekkt fyrir útlendingaandúð og baráttu sína gegn fjölmenningu og íslam og hefur til að mynda kallað eftir því að dönsk stjórnvöld banni innflytjendum sem ekki eru af vestrænum uppruna að setjast að í Danmörku.
Þegar greint var frá því að Pia myndi halda hátíðarræðu á fundinum brást almenningur og hluti þingmanna harkalega við. Þannig ákvað þingflokkur Pírata að sniðganga fundinn, Helga Vala Helgadóttir, þingkona Samfylkingarinnar, gekk af þingpallinum er Pia steig í pontu og margir þingmenn úr mismunandi stjórnmálaflokkum sýndu óánægju sína í verki með því að bera límmiða til höfuðs rasisma. Á miðunum var áletrað „Nej til racisme“ eða “Nei við kynþáttahyggju“.
Einar tekur jafnframt fram í athugasemd við eigin færslu að mikill fjöldi fólks hafi lagt leið sína á Þingvelli en færri hafi komið en áætlað hefði verið. Fyrirfram var búist við að allt að sex til sjö þúsund manns myndu mæta en aðeins létu um tvö til þrjú hundruð manns sjá sig.
Meginhlutverk Einars sem aðstoðarmaður ráðherra er að vinna að stefnumótun á málefnasviði dómsmálaráðuneytisins en undir ráðuneytið heyra meðal annars mannréttindamál, trúmál og málefni hælisleitenda.
Gagnrýna mótmælin harðlega
Á meðal þeirra sem hafa gagnrýnt mótmælin vegna ávarps og veru Piu Kjærsgaard á hátíðarfundinum er Bjarni Benediktsson fjármálaráðherra. „Þegar Alþingi Íslendinga býður forseta danska þjóðþingsins til að vera viðstaddur hátíðarhöld vegna sögulegra tímamóta finnst þessu fólki þannig við hæfi að útiloka viðkomandi einstakling, kosinn í frjálsum almennum kosningum,“ skrifaði Bjarni á Facebook um málið.
Ásmundur Friðriksson, samflokksmaður Bjarna, tjáði sig einnig um ákvörðun Pírata í gær. „Pírata sýna lítilsvirðingu sína á lýðræðinu og skoðunum fólks en mest er skömm þeirra við þjóðina að mæta ekki á þingfund á Þingvöllum á merkum tímamótum í sögu sjálfstæðisbaráttu Íslendinga,“ skrifaði Ásmundur.
Þá sagði Steingrímur J. Sigfússon, forseti Alþingis, í samtali við Vísi, að afstaða Pírata til veru Piu á hátíðarfundinum vera vonbrigði og það væri leiðinlegt fyrir Pírata að missa af þessari stund. „Þetta voru nú einu sinni samningar þar sem danska þingið og Alþingi léku lykilhlutverk. Þannig að þetta var ekki einstaklingurinn Pia Kjærsgaard með sínar umdeildu skoðanir sem var hér gestur okkar, heldur forseti danska þjóðþingsins,“ sagði Steingrímur.
Athugasemdir