Sólveig Anna Jónsdóttir, formaður Eflingar, segist stolt af árangri stéttafélagsins og aðstoðinni sem það veitti Kristýnu Králová við að sækja rétt sinn eftir að brotið var gegn henni á Hótel Adam. 

Í tilkynningu sem Efling sendi út í dag er haft eftir Sólveigu að mál Kristýnar sýni fram á mikilvægi stéttarfélaga til að verja berskjaldað vinnufólk.

„Hér er kona af erlendum uppruna blekkt með loforðum um vinnu á Íslandi en lendir svo í misnotkun, svikum og ofbeldi sem ganga út yfir öll mörk. Aðstæðurnar sem Kristýna var látin búa við eiga meira skylt við mansal en atvinnustarfsemi“.

Saga Kristýnar er rakin í nýútkomnu blaði Stundarinnar.  Hún segir söguna alla af starfsaðstæðunum, svindli og svikum, hvernig hótelgestir voru blekktir til að kaupa vatn og hvernig henni var gert að sofa í sama rúmi og eigandi hótelsins sem síðar var dæmdur til að greiða henni tæpar þrjár milljónir vegna vangoldinna launa.

Héraðsdómur Reykjavíkur dæmdi eiganda Hótel Adam til að greiða Kristýnu tæpar þrjár milljón krónur fyrir vangoldin laun, en yfirmaður hennar var með hana í starfi til margra mánaða án þess að gefa henni kennitölu eða borga laun. 

Sólveig Anna þakkar starfsfólki Eflingar fyrir að hafa staðið vörð um réttindi Kristýnar. „Þrautreyndur kjaramálafulltrúi okkar fór á staðinn í vinnustaðaeftirlit sem skipti miklu við að svipta hulunni af þessu ógeðslega máli. Kjaramálafulltrúi gerði svo launakröfu fyrir hönd starfsmannsins um leið og hún leitaði til okkar. Svo fóru lögmenn okkar með málið fyrir dóm og unnu. Ég er ótrúlega stolt af starfsfólkinu hér hjá Eflingu sem notaði reynslu sína og þekkingu til verja rétt þessa félagsmanns alla leið. Ég hvet allt verkafólk á Íslandi sem lendir í misnotkun af þessu tagi til að leita aðstoðar hjá sínu verkalýðsfélagi. Það skilar árangri.“

Nánar er fjallað um málið í nýjasta blaði Stundarinnar.