Höskuldur Pétur Jónsson, 69 ára gamall fyrrverandi byggingaverktaki, var nær dauða en lífi fyrir sex árum þegar hann datt af hesti á harðaspretti og hálsbrotnaði. Hann lamaðist tímabundið í kjölfarið og fékk í ofanálag blóðtappa í heila sem hafði mikil áhrif á heilsu hans. Í dag heilsast honum ágætlega og getur að sögn gert flesta hluti þó hann hafi ekki náð sér alveg að fullu.

Höskuldur hefur jákvæða sýn á lífið, vitandi það að hann hefði getað dáið eða farið mun verr úr slysinu en hann gerði. Hann hefur gaman af því að skrifa og er að vinna að skáldsögu. Hann málar líka þegar tækifæri gefst, en það lærði hann þegar hann var í endurhæfingu á Reykjalundi. Þá á hann tuttugu hesta sem full vinna er að hugsa um og auk þess hunda og ketti. Hann segir að það megi læra óhemjumikið af dýrunum. 

„Maður verður bara að njóta þess að vera til.“

Höskuldi finnst mikilvægt að grípa tækifærin, maður geti gert ótrúlegustu hluti. Maður viti það ekki fyrr en maður reyni það. Maður geti lent í hinu og þessu og hver dagur geti verið sá síðasti.  

„Maður getur dáið á morgun. Þess vegna er svo mikilvægt að lifa í núinu og grípa tækifærin. Ekki vera alltaf að hugsa um að gera eitthvað og gera það svo aldrei. Ég hef verið að horfa til baka og ég man að ég gerði allt of mikið. Byggjandi hús úti um allt, alltaf vinnandi. Ég var svo vitlaus að peningar skiptu mig engu máli, en það er engin hamingja í því að eyða peningum. Af hverju ekki bara að lifa lífinu? Maður verður bara að njóta þess að vera til.“