Þrír þingmenn Sjálfstæðisflokksins, þeir Njáll Trausti Friðbertsson, Vilhjálmur Árnason og Haraldur Benediktsson, vilja að samgöngu- og sveitarstjórnarráðherra hefji undirbúning að endurnýjun vegarins yfir Kjöl sem heilsársvegar með einkaframkvæmd. Þannig verði einkaaðilum falin uppbygging og endurnýjun núverandi Kjalvegar sem ferðamannavegar. Þingmennirnir lögðu fram þingsályktunartillögu þess efnis sem birtist á vef Alþingis í gær.
Fram kemur í greinargerð tillögunnar að gert sé ráð fyrir að einkaaðili taki að sér fjármögnun, framkvæmd og rekstur verkefnisins í umboði hins opinbera. Framkvæmdin muni standa undir sér að öllu leyti með notendagjöldum líkt og í tilviki Hvalfjarðarganga.
„Mörg rök hníga að því að endurbæta vegarkaflann og má þar nefna öryggissjónarmið, byggðasjónarmið og sjónarmið um umhverfisvernd. Þá hafa Samtök ferðaþjónustunnar lýst sárum vonbrigðum með að vegarkaflinn hafi ekki fengið brautargengi í síðustu samgönguáætlun og bent á mikilvægi þess að vegasamgöngur milli landshluta verði bættar, ekki síst vegna stóraukins ferðamannastraums síðastliðinna ára. Það verður að teljast fullkannað að samgöngubætur hafa jákvæð áhrif á öryggi, nærsamfélag og efnahag,“ segir í greinargerðinni.
Hvalfjarðargöng eru nefnd sem dæmi um einkaframkvæmd sem heppnaðist vel. „Veggjöld hafa að öllu leyti staðið undir fjármögnun, rekstri og viðhaldi ganganna og er fyrirséð að Spölur hf. muni afhenda ríkinu göngin að samningstíma liðnum eða undir lok þessa árs. Reynslan af þessu viðamikla verkefni sem Hvalfjarðargöng svo sannarlega eru mun án efa nýtast í framtíðarverkefni þar sem farin verður svipuð leið.“
Athugasemdir