Meðlimir Sigur Rósar eru ósáttir með að eignir þeirra hafi verið kyrrsettar vegna rannsóknar á meintum skattalagabrotum. Georg Hólm, bassaleikari Sigur Rósar, segir að hljómsveitarmeðlimir hafi unnið að því um langa hríð með skattayfirvöldum að greiða úr skattaskuld sem myndaðist vegna handvammar endurskoðanda hljómsveitarinnar. Hann viti ekki betur en að búið sé að greiða skuldina alla og vexti af henni. Georg segir að hljómsveitarmeðlimum líði eins og þeir hafi verið stungnir í bakið hér á Íslandi og þeir hafi aldrei upplifað annað eins í samskiptum við fólk sem þeir hafi ráðið til vinnu erlendis.

Eru tónlistarmenn, ekki endurskoðendur

Greint var frá því í Fréttablaðinu í morgun að eignir meðlima Sigur Rósar upp á 800 milljóna króna hefðu verið kyrrsettar vegna rannsóknar skattrannsóknarstjóra á hugsanlegum skattalagabrotum. Þar kemur fram að krafan hafi verið tekin fyrir og birt þeim Jóni Þór Birgissyni, Orra Páli Dýrasyni og Georg Hólm í desember. Hæsta krafan hafi verið á hendur Jóni Þór, eða 683 milljónir króna. Þrettán fasteignir, tvö bifhjól, tveir bílar, sex bankareikningar og hlutafé í þremur fyrirtækjum voru kyrrsettar vegna kröfunnar á hendur honum. Tvær fasteignir Orra Páls voru kyrrsettar og sömuleiðis tvær fasteignir í eigu Georgs. 

Georg segir í samtali við Stundina að þetta sé rétt. „Málið er af okkar hálfu mjög einfalt. Okkur finnst þessi kyrrsetning í raun og veru jaðra við dónaskap þar sem við erum búnir að vinna með skattayfirvöldum í þó nokkurn tíma vegna málsins. Þetta snýst allt um endurskoðanda sem sinnti okkar málum á vissu tímabili. Sá starfaði hjá Price Waterhouse Coopers en stofnaði svo sitt eigið fyrirtæki og við fylgdum honum. Við erum tónlistarmenn, við erum ekki endurskoðendur. Við ráðum fólk í vinnu til að sinna fjármálahliðinni, enda höfum við alltaf viljað standa skil á okkar. Þess vegna réðum við þann sem við héldum að væri besti endurskoðandinn, mann sem við héldum að gæti varið okkar hagsmuni en á sama tíma séð til þess að öllum lögum og reglum væri fylgt. Við höfum engan áhuga á að brjóta nein lög. Hann hins vegar einfaldlega stendur ekki undir þessu trausti, hann vinnur ekki vinnuna sína.

„Hér heima er maður bara ítrekað stunginn í bakið“

Þess vegna kemur þetta upp og staðan er sú, að því er ég best hef skilið, að við erum búnir að borga þessa skuld og vexti ofan á. Við erum meira að segja farnir að borga skatta fyrirfram. Þess vegna þykir mér þetta undarlegt, að það sé verið að kyrrsetja eignir okkar. Enginn okkar hefur áhuga á að flýja undan neinu og við erum ekki að fela neitt.“

Eins og að borga hraðasekt fyrir að taka leigubíl

Umræddar eignir voru kyrrsettar einhvern tíman í kringum áramót að því er Georg segir. Viðræður meðlima Sigur Rósar við skattayfirvöld hófust hins vegar talsverðu fyrir þann tíma, og eins og Georg segir hér að ofan þá taldi hann að búið væri að greiða þær upphæðir sem um væri að ræða. „Við fengum endurskoðendur og lögmenn í vinnu við að laga þetta allt, allt þetta klúður. En ég verð þó að segja að íslensk lög eru að sumu leyti undarleg hvað þetta varðar, það er að segja að þó ég hafi ekkert gert rangt þá er ég ábyrgur fyrir þessum manni sem ég réð í vinnu til að sinna fjármálum. Mér finnst það mjög leiðinlegt, ég væri til í að hann væri í þessari súpu en ekki ég. Hann var ráðinn í vinnu til að koma í veg fyrir að svona kæmi fyrir. Mér líður dálítið eins og ég hafi tekið leigubíl sem hefur verið keyrt of hratt en ég þurfi að greiða hraðasektina. Þetta er allt mjög leiðinlegt.“

„Enginn okkar hefur áhuga á að flýja undan neinu og við erum ekki að fela neitt“

Georg segir að það hafi verið áfall þegar málið kom upp og það sígi verulega í fjárhagslega. „Að sjálfsögðu. Við erum að borga allt sem við skulduðum plús vexti. Svo geta skattayfirvöld í raun sett á okkur sektir, sem ég ekki alveg skil vegna þess að við erum, eins og ég segi, búnir að greiða þetta og höfum sýnt fullan samstarfsvilja. Kyrrsetning eignanna var þess vegna eins og blaut tuska í andlitið á okkur. Ég veit ekki betur en við séum búnir að borga allt sem við skulduðum en þarna er greinilega einhver rannsókn í gangi svo mögulega er þessi kyrsetning einhver trygging ef við verðum sektaðir. Ég veit það þó ekki.“

Ítrekað stungnir í bakið

Það hefur ekki ríkt nein lognmolla í kringum Sigur Rós upp á síðkastið en á síðasta ári kom í ljós að fyrirframgreiðsla sem tónlistarhúsið Harpa hafði innt af hendi til tónleikahaldarans Kára Sturlusonar vegna fyrirhugaðra tónleika Sigur Rósar skilaði sér ekki til tónleikahaldsins. Um 35 milljónir króna var að ræða og er það mál nú rekið í dómstólum þar sem Harpa stefndi Kára til greiðslu á þeim fjármunum. Georg viðurkennir að þessir síðustu mánuðir hafi verið erfiðir.

„Það má nú alveg segja það já, við höfum verið að grínast með að við kunnum sannarlega að velja okkur samstarfsfólk. Við höfum aldrei upplifað neitt í líkingu við þetta, við erum með fullt af fólki í vinnu, endurskoðendur, lögmenn og aðra, í Bandaríkjunum, Bretlandi og annars staðar, og þar hefur allt staðið eins og stafur á bók. Hér heima er maður bara ítrekað stunginn í bakið.“