„Mér finnst rétt að spyrja hæstvirtan fjármálaráðherra: Hvenær vissi hann um þessa flutninga, og þar sem þetta eru umfangsmiklir flutningar, er það trúverðugt að enginn ráðherra hafi vitað neitt í öll þessi ár?“
Þannig spurði Logi Einarsson, formaður Samfylkingarinnar, í óundirbúnum fyrirspurnatíma á Alþingi á ellefta tímanum þegar hann átti orðastað við Bjarna Benediktsson fjármálaráðherra um vopnaflutninga Atlanta og leyfisveitingar íslenskra stjórnvalda.
Bjarni sagði Loga fara með „rakalausan áburð“ og sagði fráleitt að ætlast til þess að hann sem fjármálaráðherra og forsætisráðherra hefði átt að vera kunnugt um vopnaflutningana. „Ég átta mig ekki á því hvað háttvirtur þingmaður á við þegar hann segir að ég sem fjármálaráðherra, eftir atvikum forsætisráðherra, hafi átt að vita hvaða farmur var í einstökum flugvélum íslenskra lögaðila í útlöndum milli landa. Hvert er háttvirtur þingmaður eiginlega kominn?“ sagði Bjarni. „Heldur hann virkilega að fjármálaráðherra sé ða fara yfir farmskrárnar? Þetta er algjörlega rakalaus áburður sem er hér færður fram og augljóst að það hefur aldrei verið á mínu borði að fara yfir þau stjórnsýslulegu atriði sem þarf að gá að í þessum málum.“
Kallaði Bjarni eftir málefnalegri umræðu um alvarleg mál á borð við vopnaflutninga til stríðshrjáðra landa og gagnrýndi Loga fyrir „ómerkilegt skítkast“.
Logi gaf lítið fyrir þau orð. „Þegar mál eru falin í eitt skipti getum við kallað það slys. Í annað skipti eru það hugsanlega slæleg vinnubrögð en þegar það gerist í þriðja, fjórða og fimmta skipti þá heita það vinnureglur. Sjálfstæðisflokkurinn hefur sannarlega sýnt hverjar hans vinnureglur eru þegar kemur að gögnum sem honum finnst ekki eiga að koma fyrir alþjóð og geti komið flokknum illa,“ sagði hann.
Athugasemdir