Tak i lige måde: Samtímalist frá Danmörku

Hvar? Hafnarhúsið 
Hvenær? 23. febrúar–21. maí
Aðgangseyrir: 1.650 kr.

Í ár er heil öld síðan að Ísland hlaut fullveldi og síðan þá hefur heimsmynd fyrrum herraþjóðar hennar, Danmörku, tekið stakkaskiptum. Samhliða því að umsvifum þjóðarinnar á alþjóðavettvangi hefur farið minnkandi hefur mikil gróska átt sér stað í myndlistarheimi hennar. Þessi fjölbreytta sýning reynir að fanga stefnur og strauma fjögurra valinkunnra danskra samtímalistarmanna. Sýningin verður opnuð 23. febrúar kl. 20.00, en klukkan 21.00 ræðir danski myndlistarmaðurinn Jesper Just við Markús Þór Andrésson sýningarstjóra um verk sín og feril.

Norræna kvikmyndahátíðin

Mynd: Juuli Aschan

Hvar? Norræna húsið
Hvenær? 22.–27. febrúar
Aðgangseyrir: Ókeypis!

Á þessari hátíð, sem hefur verið haldin frá 2012, er reynt að kynna gestum fyrir breiðu úrvali af vönduðum kvikmyndum, heimildarmyndum og stuttmyndum frá Norðurlöndunum. Í ár má sjá verðlaunamyndirnar „The Square“, The Punk Syndrome“, „The Unknown Soldier“ og fleiri að kostnaðarlausu og með enskum texta. Frímiða er hægt að panta á tix.is.

Brött brekka, Great Grief, Spünk, World Narcosis

Hvar? Húrra
Hvenær? 28. febrúar kl. 20.00
Aðgangseyrir: Ókeypis!

Á lokakvöldi febrúarmánaðarins munu þessar fjórar ærslafullu hljómsveitir bjóða gestum að mosha í gegnum nóttina og fagna bjartari dögum. Fram koma indí rokkararnir í Brattri brekku, harðkjarna-pönksveitin Great Grief, lotningarlausu rokkararnir í Spünk, og drungalega pönksveitin World Narcosis.

Meðgönguljóð nr. 26, 27 & 28

Hvar? Mengi
Hvenær? 28. febrúar kl. 20.00
Aðgangseyrir: Ókeypis!

Meðgönguljóð er bókaflokkur Partusar sem er helgaður nýjabruminu í íslenskri ljóðlist, og á þessu kvöldi er haldið upp á þrjár mismunandi útgáfur í þessum flokki. Lesið verður úr bókunum „Salt“ eftir Maríu Ramos, „FREYJA“ eftir Díönu Sjöfn Jóhannsdóttur, og „Ódauðleg brjóst“ eftir Ásdísi Ingólfsdóttur. Léttar veitingar verða í boði.

Stockfish-kvikmyndahátíð

Hvar? Bíó Paradís
Hvenær? 1.–11. mars
Aðgangseyrir: 10.990 kr.

Yfir 20 handvaldar alþjóðlegar verðlaunamyndir eru sýndar á Stockfish-hátíðinni sem er haldin núna í fjórða skiptið. Innlent og erlent kvikmyndagerðarfólk, eins og Arne Bro og Steve Gravestock, tekur þátt í pallborðsumræðum. Einnig er fjölbreytt úrval af vinnustofum, meðal annars einni fyrir norrænar kvikmyndagerðarkonur.

Reykjavík Folk festival

Mynd: Soffía björg

Hvar? KEX Hostel
Hvenær? 1.–3. mars
Aðgangseyrir: 3.300 kr. fyrir eitt kvöld, 6.600 kr. fyrir hátíðarpassa.

Þjóðlagatónlistarhátíðin Reykjavík Folk Festival er þriggja daga tónlistarveisla með fjölbreyttri þjóðlagatónlistarflóru af hinni ýmsu gerð, með listamönnum á öllum aldri og með skemmtilega ólíkan bakgrunn. Fram koma meðal annars Soffía Björg, Pétur Ben, Lára Rúnars, Myrra Rós og Teitur Magnússon.

Moses Hightower

Hvar? Húrra
Hvenær? 2. & 3. mars kl. 21.00
Aðgangseyrir: 2.500 kr.

Ljúflingarnir í Moses Hightower gáfu út plötuna „Fjallaloft“ í fyrra, en á henni heldur hljómsveitin áfram að fjalla um náin viðfangsefni á blíðan hátt með silkimjúku undirspili. Búast má við því að heyra flest lögin af þeirri plötu á þessum tónleikum, svo og vel valin lög af fyrri plötunum, „Önnur Mósebók“ og „Búum til börn“.

Girl Power-danspartí

Hvar? Gaukurinn
Hvenær? 8. mars kl. 20.00
Aðgangseyrir: 2.000 kr.

Á þessu danskvöldi, sem er haldið á alþjóðadag kvenna, verða spilaðir margir af helstu slögurum síðustu ára; Diana Ross, Beyonce, Janis Joplin, Ragga Gísla, Heart, Aretha Franklin, Jennifer Lopez, Dorothy, Emiliana Torrini, svo áfram mætti halda. Hluti af ágóðanum af miðasölunni rennur til Stígamóta.