Norður og niður

Hvar? Harpa
Hvenær? 27.–30. desember
Aðgangseyrir: 20.990 kr.

Skrítnu, furðulegu, dásamlegu og heillandi strákarnir í Sigur Rós ákváðu að spila ekki aðeins fjóra tónleika á fjórum dögum, heldur hafa þeir boðið nokkrum tugum vina sinna að taka þátt í tónlistarhátíð til að fagna vaxandi birtu í myrkasta svartnættinu. Meðal gesta eru Peaches, Dustin O’Halloran, Amiina, Mogwai, JFDR, Sin Fang og fleiri.

Spünk, Dauðyflin, xGADDAVíRx, ROHT

Hvar? Gaukurinn
Hvenær? 27. desember kl. 21.00
Aðgangseyrir: Ókeypis

Þessar fjórar pönkhljómsveitir efna til tónleika sem kallast „Milli njóla og nýfárs“. Búast má við miklum hávaða, mikilli orku og duglegu moshi frá öllum pönkurunum sem hafa setið fúlir heima með hendur í vösum á meðan almúgurinn hefur verið heltekinn af smáborgaralega jólaandanum.

Dömur og herra burlesque sýning

Hvar? Gaukurinn
Hvenær? 28. desember kl. 21.00
Aðgangseyrir: 2.500 kr.

Burlesque-senan í Reykjavík hefur farið vaxandi á undanförnum árum; Dömur og herra er nýjasti hópurinn sem stígur fram í sviðsljósið, en hann kom fyrst fram á þessu ári. Þetta er þeirra þriðja sýning og má búast við fjölbreyttum atriðum, allt frá klassísku burlesque og dúskasveiflum yfir í létt grín yfir íslenskum jóla- og áramótaveruleika. 

Vök & aYia

Hvar? Húrra
Hvenær? 28. desember kl. 21.00
Aðgangseyrir: 2.500 kr.

Á þessu kvöldi koma fram þær tvær hljómsveitir sem eru fremstar og færastar á sínu sviði. Indí-poppararnir Vök unnu Músíktilraunir 2013 og hafa síðan þá gefið út tvær breiðskífur og spilað víðs vegar um heiminn. aYia er dimmt og draumkennt rafmagnað þríeyki sem spilar tónlist sem passar varla inn í tíma eða rúm, eins og kafli úr miðri bók sem þú kannast ekki við, en getur ekki lagt frá þér.

Andrými í litum og tónum

Mynd: Þráinn Hjálmarsson og Sigurður Guðjónsson

Hvar? Listasafn Íslands
Hvenær? 29. desember kl. 12.10
Aðgangseyrir: Ókeypis

Íslenski flautukórinn og Listasafn Íslands standa fyrir hádegistónleikaröð sem er haldin síðasta föstudag hvers mánaðar þar sem boðið er upp á fjölbreytta tónlist. Tilgangur andrýmisins er að gefa fólki kost á að eiga nærandi stund við samtal milli sjónlistar og tónlistar.

Hórmónar, Gróa, Korter í flog, Tófa

Mynd: Ian Young / Nounpusher

Hvar? Gaukurinn
Hvenær? 29. desember kl. 22.00
Aðgangseyrir: 1.500 kr.

Í annað skiptið á einum mánuði spila ungu rokkararnir í Gróu með femínísku pönkurunum í Hórmónum sem taka pláss, hafa hátt og spila tilfinningaríka tónlist. Með þeim í för eru Korter í flog, sem komust á úrslitakvöld Músíktilrauna 2017, og Tófa sem hefur verið að spila listrænt pönk í nokkur ár.

Heimkomutónleikar Mammúts

Hvar? Gamla bíó
Hvenær? 4. janúar kl. 21.00
Aðgangseyrir: 4.500 kr.

Kyngimagnaða listræna rokksveitin Mammút hefur verið á tónlistarferðalagi um heiminn síðasta ár að kynna nýju plötuna sína, „Kinder Versions“, en því ferðalagi lýkur í Gamla bíói. Búast má við að platan verði tekin nánast í heild sinni, auk nokkurra eldri laga af fyrri plötum hljómsveitarinnar „Komdu til mín svarta systir“ og „Karkari“.

Sólveig Matthildur, Madonna + Child, Nicolas Kunysz, åtåmåtån 

Hvar? Gaukurinn
Hvenær? 6. janúar kl. 21.00
Aðgangseyrir: 1.000 kr.

Sólveig Matthildur hefur fryst hjörtu og opnað fyrir tárakirtla með plötu sinni „Unexplained myseries & the acceptance of sorrow“ sem kom út í haust. Sólveig er hljóðgervilsspilari Kælunnar miklu, en hún hefur það hefur aðeins verið við örfá tilefni sem hún hefur komið fram á Íslandi með sólóefni sitt. Á þessu kvöldi kryfur hún hugtökin eymd og upplausn með döprum tónum og þremur öðrum hljómsveitum.

WANG WEN & For A Minor Reflection 

Hvar? Húrra
Hvenær? 10. janúar kl. 21.00
Aðgangseyrir: 2.000 kr.

Kínverska síðrokkshljómsveitin Wang Wen hefur verið að störfum í 18 ár. Á þeim tíma hefur hún gefið út níu breiðskífur og haldið í fjóra Evróputúra, en hún kemur fram á Íslandi í fyrsta skiptið. Hún kemur fram með íslensku rokksveitinni For a Minor Reflection sem hefur verið virk í rúman áratug.