Guð blessi Ísland

Hvar? Borgarleikhúsinu
Hvenær? 20. október–2. nóvember
Aðgangseyrir: frá 3.000 kr.

Nýja leikrit Mikaels Torfasonar og Þorleifs Arnar Arnarssonar snýst, eins og titillinn gefur til kynna, um efnahagshrunið og Rannsóknarskýrslu Alþingis. Þrátt fyrir að viðfangsefnið sé gott efni í harmleik er í þessari sýningu gerður gleðileikur úr því, og reynt að kanna brothætta sjálfsmynd Íslendinga í gegnum tónlist, dans, myndlist, leik og sprell.

Benny Crespo's Gang & Coral

Hvar? Húrra
Hvenær? 20. október kl. 21 
Aðgangseyrir: 1.500 kr.

Það eru tíu ár síðan að sjálftitlaða frumraun rokkaranna í Benny Crespo's Gang kom út, en eftir nokkurra ára pásu snúa þeir aftur, en sögur herma að það styttist í aðra breiðskífu þeirra. Rokksveitin Coral leggur þeim lið, en hún hefur líka verið í dvala síðustu ár en snýr aftur nostalgíunnar vegna.

Mugison á trúnó

Mynd: Kristinn Magnússon

Hvar? Hljómahöll, Reykjanesbæ
Hvenær? 21. október
Aðgangseyrir: 3.900 kr.

Brennisteins-predikara-söngskáldið Mugison sem er (ekki) frá Ísafirði gaf út fimmtu plötuna sína, „Enjoy!“ í fyrra. Á henni er að finna bæði ljúf lög sem og gróf, en hann flytur fagnaðarerindið enn á ný í Keflavík þennan laugardag. Búast má við góðu jafnvægi af gömlum sem og nýjum lögum.

Tveir samherjar

Hvar? Listasafni Íslands
Hvenær? 21. október–13. maí
Aðgangseyrir: 1.500 kr.

Verkum tveggja áhrifavalda framúrstefnulistarinnar í Danmörku á fjórða og fimmta áratugnum, Sigurjóns Ólafssonar (1908–1982) og Asger Jorn (1914–1973), er stillt upp saman í þessari sýningu til að varpa ljósi á ókönnuð tengsl milli þessara áhrifamiklu listamanna, en þeir áttu í nánum tengslum. Sýningarstjóri er Birgitta Spur.

Rise Against

Hvar? Hörpu
Hvenær? 23. október kl. 20 
Aðgangseyrir: 9.990 kr.

Goðsagnakennda bandaríska melódíska harðkjarna pönksveitin Rise Against herjar á Íslandsstrendur, en hún hefur verið starfrækt í næstum því tvo áratugi og gefið út átta breiðskífur. Þar að auki eru meðlimir hennar miklir hugsjónamenn, og lögðust meðal annars gegn endurkjöri George W. Bush árið 2004. Íslenska dúndursveitin Une Misère hitar upp.

Kosningavakan

Hvar? Valsheimilinu
Hvenær? 28. október kl. 20 
Aðgangseyrir: eitt atkvæði

Á tíma þar sem kosningaþátttaka fer snarminnkandi, sérstaklega hjá ungu fólki, er efnt til kosningavöku. Þar koma fram sautján mismunandi hljómsveitir og tónlistarmenn, meðal annars Reykjavíkurdætur, Páll Óskar, Cell7, Aron Can og Hildur. Ókeypis er inn, svo lengi sem gestir sýni mynd af sér á kjörstað.

Iceland Airwaves

Hvar? Reykjavík og Akureyri
Hvenær? 1.–5. nóvember
Aðgangseyrir: 21.900 kr.

Iceland Airwaves er án efa hápunktur íslensks tónlistarlífs. Þegar hátíðin stendur yfir er miðbær Reykjavíkur undirlagður af tónlist og spennandi viðburðum, en í ár er hátíðin líka haldin á Akureyri 2. og 3. nóvember. Alls koma 218 atriði fram í ár, þar með talin Billy Bragg, Mumford & Sons, Fleet Foxes, Pinegrove, og Emilíana Torrini.

Stór-Ísland

Hvar? Hafnarhúsi
Hvenær? til 2. febrúar
Aðgangseyrir: 1.600 kr.

Sýningin samanstendur af verkum sjö listamanna frá Norðurlöndunum, Þýskalandi, Ítalíu, Hollandi og Bandaríkjunum sem hafa allir búið og starfað á Íslandi um lengri eða skemmri tíma. Sýningin sýnir fjölbreytileikann sem hefur náð kjölfestu á listasviði Íslands. Sýningarstjórinn, Yean Fee Quay, verður með leiðsögn 2. nóvember klukkan 20.