Bjarni Benediktsson viðurkenndi á fundi í Valhöll rétt í þessu að hann hefði leynt nánum tengslum sínum við meðmælanda í málum sem varða uppreist æru.

Hann ákvað fyrst að upplýsa flokksformenn Viðreisnar og Bjartrar framtíðar um að faðir hans væri meðmælandi eins aðilans eftir að Stundin sendi dómsmálaráðuneytinu fyrirspurn.

Bjarni fékk upplýsingar um málið í lok júlí frá Sigríði Andersen dómsmálaráðherra, en segir að ráðuneyti hennar hafi verið búið að ákveða að halda trúnað um málið. Sjálfur hafi hann því einnig þagað um málið. 

„Mér var það síðan ljóst fyrir nokkrum dögum síðan vegna þess að fjölmiðlar höfðu lagt fram fyrirspurn sem gaf til kynna að þeir hefðu þeir þá þegar upplýsingar um þetta,“ sagði Bjarni. „Stefndi í opinbera umfjöllun um þetta mál óháð niðurskurði úrskurðarnefndar,“ bætti hann við.

Bjarni upplýsti þannig ekki um tengsl sín fyrr en hann varð þess áskynja að upp um þau gæti komist.

Fyrirspurn ekki svarað

Stundin sendi fyrirspurn á dómsmálaráðuneytið í síðustu viku, þann 6. september, sem ekki var svarað þrátt fyrir ítrekanir. Hún var svohljóðandi:

1. Tengist einn af umsagnaraðilum Hjalta Sigurjóns Haukssonar, vegna uppreistar æru hans, forsætisráðherra nánum fjölskylduböndum? 

2.  a) Ef já, vissi dómsmálaráðherra af fjölskyldutengslunum þegar ákveðið var að upplýsa ekki um nöfn umsagnaraðila þeirra sem fengið hafa uppreist æru og að svara ekki fyrirspurnum þolenda um málin?  b) Upplýsti forsætisráðherra aðra ráðherra um tengsl sín við umsagnaraðila eins af umsækjendum um uppreist æru þegar málin voru afgreidd úr ríkisstjórn á haustmánuðum 2016?

Fundar með forseta á morgun

„Ég mun beita mér fyrir því að það verði kosið á Íslandi sem allra fyrst. Þessi ríkisstjórn hefur tapað meirihluta sínum á þinginu,“ sagði Bjarni á fundinum.

 Hann segist vilja kjósa í nóvember.

 Forseti Íslands mun funda með Bjarna klukkan 11 á morgun.

„Þessi staða hefur að mínu áliti skapast að óþörfu,“ sagði Bjarni.