Aðgerðalisti ríkisstjórnarinnar sem ætlað er að styðja við kjarasamninga á almennum vinnumarkaði er enn ekki fullfrágenginn. Sama á við um sameiginlega yfirlýsingu ríkisstjórnarinnar og aðila vinnumarkaðarins.
Þetta kemur fram í tilkynningu frá upplýsingafulltrúa forsætisráðuneytisins. Þar segir að enn standi yfir samtal um endanlega útgáfu aðgerðalistans og yfirlýsingar ríkisstjórnarinnar, Alþýðusambands Íslands, Samtaka atvinnulífsins og Sambands íslenskra sveitarfélaga. Efni þeirra verði kynnt þegar þeirri vinnu lýkur.
Tilkynningin kemur í kjölfar þess að Vilhjálmur Birgisson, formaður Starfsgreinasambands Íslands, greindi ítarlega frá fyrirhuguðum aðgerðum stjórnvalda í færslu á Facebook.
Dregið úr gjaldahækkunum og gefið í barnabætur
Eins og Heimildin fjallaði um í morgun sagði Vilhjálmur meðal annars að ríkið hygðist halda hækkunum krónutölugjalda og gjaldskráa ríkisstofnana sem hafa bein áhrif á vísitölu neysluverðs innan 2,5 prósenta árið 2027. Kílómetragjaldið yrði þó undanskilið.
Vilhjálmur sagði jafnframt að barnabætur og skerðingarmörk þeirra yrðu hækkuð, settar skorður við hækkunum húsaleigu og sérstakar vaxtabætur greiddar skuldsettum heimilum árið 2028 ef verðbólga verður yfir tilteknum mörkum í lok október á næsta ári.
Tilkynning forsætisráðuneytisins þýðir að endanlegt umfang og útfærsla þessara aðgerða liggur ekki enn fyrir, jafnvel þó að Vilhjálmur, sem samþykkti fyrir hönd stórs hluta launafólks að framlengja kjarasamninga þrátt fyrir forsendubrest, hafi fullyrt að ríkið ætlaði að ráðast í þessar aðgerðir.
Ekki er því ljóst hvort öll þau atriði sem Vilhjálmur greindi frá verði óbreytt í endanlegum aðgerðalista eða hvernig einstök fyrirheit verða orðuð.
Aðgerðarlisti lagður fyrir ríkisstjórn
Kristrún Frostadóttir forsætisráðherra hafði áður lagt aðgerðir stjórnvalda vegna kjarasamninganna fyrir ríkisstjórnina. Nú stendur hins vegar áfram yfir vinna með ASÍ, Samtökum atvinnulífsins og Sambandi íslenskra sveitarfélaga að sameiginlegri yfirlýsingu og endanlegri gerð aðgerðalistans.
Starfsgreinasamband Íslands, Efling, Samiðn og Byggiðn hafa þegar náð samkomulagi við Samtök atvinnulífsins um að framlengja gildandi kjarasamninga. Enn ríkir hins vegar óvissa um samninga VR, Landssambands verzlunarmanna og Fagfélaganna.
Ljóst má vera að aðgerðarpakkinn sem Vilhjálmur telur að ríkisstjórnin hafi boðið mun kosta fjármuni. Það að takmarka gjaldahækkanir við 2,5 prósent þýðir tekjurýrnun upp á 1,6 milljarða króna miðað við fjárlagafrumvarpið eins og það var lagt fram. Hækkun barnabóta og greiðsla sérstakra vaxtabóta, takist ekki að ná böndum á verðbólgu, þýða svo enn meiri útgjaldaaukningu.
Ríkisstjórnin lagði upp með að ríkisreksturinn myndi skila 4,7 milljarða króna afgangi á næsta ári. Lítið þarf því út af að bregða til að sá afgangur breytist í halla.
Athugasemdir