Peningastefnunefnd Seðlabanka Íslands hefur ákveðið að hækka vexti bankans um 0,25 prósentur. Meginvextir bankans, svokallaðir stýrivextir, verða því 7,75 prósent.

Allir nefndarmenn studdu ákvörðunina.

Í yfirlýsingu nefndarinnar segir að verðbólga hafi verið yfir fimm prósentum það sem af er ári og mælist nú 5,2 prósent. Verðbólguvæntingar hafi jafnframt hækkað, einkum til skamms tíma.

Nefndin bendir á að hækkun verðbólguvæntinga frá því að stríðsátök hófust í Mið-Austurlöndum sé þó ekki jafn mikil og í kjölfar innrásar Rússa í Úkraínu fyrir fjórum árum. Þar vegi þungt að spennan í þjóðarbúinu hafi þá verið töluvert meiri.

Samkvæmt nýrri spá Seðlabankans eru horfur á minni hagvexti og meira atvinnuleysi en bankinn spáði í febrúar. Á sama tíma hafa verðbólguhorfur versnað vegna mikillar hækkunar olíu- og hrávöruverðs og viðvarandi innlends verðbólguþrýstings.

Í yfirlýsingunni segir að efnahagsaðstæður gætu þróast til verri vegar ef truflanir á alþjóðlegum olíumarkaði vara lengur en nú er gert ráð fyrir eða ef kjarasamningum verður sagt upp síðar á árinu.

Peningastefnunefnd telur rétt að hækka vexti í ljósi verri verðbólguhorfa og hárra verðbólguvæntinga. Nefndin segist jafnframt tilbúin að herða taumhald peningastefnunnar enn frekar til að tryggja að verðbólga hjaðni að markmiði, þótt það gæti hægt enn frekar á efnahagsumsvifum.

Mótun peningastefnunnar muni sem fyrr ráðast af þróun efnahagsumsvifa, verðbólgu og verðbólguvæntinga.