Sorgmæddir Palestínumenn grétu yfir líkum fjögurra fjölskyldumeðlima, þar á meðal tveggja barna, sem palestínska heilbrigðisráðuneytið sagði að hefðu verið skotin til bana fyrr í dag af ísraelskum hersveitum á hernumda Vesturbakkanum.

Ísraelski herinn og lögreglan sögðu að hermenn hefðu hafið skothríð á bifreið vegna meintrar öryggisógnar og drepið fjóra einstaklinga í henni.

„Fjórir píslarvottar úr einni fjölskyldu komu á tyrkneska ríkissjúkrahúsið í Tubas eftir að hernámsliðið skaut á þá í Tammun,“ sagði palestínska heilbrigðisráðuneytið í Ramallah.

Þar kom fram að sjúkrahúsið hefði tekið á móti líkum 37 ára gamals manns, 35 ára gamallar eiginkonu hans og tveggja drengja, fimm og sjö ára, og bætti við að allir hefðu verið með skotsár.

Ljósmyndir AFP sýna tugi fjölskyldumeðlima koma saman til að syrgja hina látnu.

Konur grétu yfir ástvinum sínum sem vafðir voru í palestínska fána og kuffiyeh-trefla, á meðan einn maður lyfti líki barns yfir mannfjöldann.

Móðirin öskraði, faðirinn fór með bæn

„Móðir mín öskraði einu sinni enn og þagnaði svo, á meðan faðir minn fór með Shahada (íslamska trúarjátninguna) áður en hann dó,“ sagði Khaled Ali Bani Odeh, annað tveggja barna sem lifðu af.

„Þeir drógu mig út (úr bílnum) og byrjuðu að hoppa á bakinu á mér. Svo fóru þeir með mig út í horn og spurðu mig hvað hefði gerst og hverjir hefðu verið með mér í bílnum.“

„Ég sagði þeim að það hefðu verið pabbi minn og mamma. Þeir sögðu að ég væri að ljúga og byrjuðu að berja mig,“ sagði hinn 11 ára gamli við blaðamenn í viðurvist ættingja við útför foreldra sinna og tveggja systkina.

Ísraelski herinn brást ekki strax við ásökunum hans en staðfesti dauðsföllin.

Herinn og lögreglan sögðu í sameiginlegri yfirlýsingu að í aðgerð í Tammun hafi „bifreið gefið í í átt að hersveitunum, sem litu á það sem bráða ógn við öryggi sitt og brugðust við með skothríð“.

„Fyrir vikið voru fjórir Palestínumenn sem voru í bifreiðinni drepnir,“ sagði þar og bætt var við að atvikið væri í rannsókn.

Í yfirlýsingu sem birt var á X fordæmdi palestínska utanríkisráðuneytið morðin harðlega og sagði þau „ekki einangruð“ atvik, heldur „hluta af umfangsmikilli og kerfisbundinni árásargirni“ Ísraelsmanna gegn Palestínumönnum.

Palestínska fréttastofan WAFA greindi frá því að hin tvö börn hjónanna, átta og ellefu ára, hefðu særst af sprengjubrotum eftir að ísraelskar hersveitir hófu skothríð á bifreið þeirra snemma í morgun.

Kveður systkini sínMustafa kyssir annað systkina sinna sem létust í árás Ísraels á bíl fjölskyldunnar í morgun.

Mynd: JAAFAR ASHTIYEH / AFP

Meira ofbeldi við upphaf Íransstríðsins

Ofbeldi á Vesturbakkanum, sem Ísrael hefur hernumið síðan 1967, hefur aukist verulega frá því að árás Hamas á Ísrael 7. október 2023 hratt af stað stríðinu á Gaza.

Einnig hefur orðið aukning í mannskæðum árásum ísraelskra landtökumanna á Vesturbakkanum frá upphafi stríðsins við Íran, að sögn palestínskra yfirvalda og Sameinuðu þjóðanna, en að minnsta kosti sex Palestínumenn hafa verið drepnir frá byrjun mars.

Palestínsk yfirvöld sögðu að ísraelskir landtökumenn hefðu skotið palestínskan mann til bana í gær í árás á þorpið Qusra, á meðan tveir aðrir íbúar særðust.

Herinn staðfesti í dag að „vegna skothríðar eins hinna grunuðu Ísraelsmanna hafi palestínskur borgari verið drepinn og fleiri palestínskir borgarar særst og verið fluttir til frekari læknismeðferðar“.

Hafa drepið þúsund á Vesturbakkanum

Samkvæmt samantekt AFP sem byggir á tölum frá palestínska heilbrigðisráðuneytinu hafa ísraelskir hermenn eða landtökumenn drepið að minnsta kosti 1.045 Palestínumenn – margir þeirra vígamenn, en einnig fjöldi almennra borgara – á Vesturbakkanum frá upphafi stríðsins á Gaza.

Opinberar tölur frá Ísrael segja að 45 Ísraelar, bæði hermenn og almennir borgarar, hafi verið drepnir í árásum Palestínumanna eða í hernaðaraðgerðum Ísraels.

Auk um þriggja milljóna Palestínumanna búa meira en 500.000 Ísraelar í landnemabyggðum og útvörðum á Vesturbakkanum, sem eru ólöglegar samkvæmt alþjóðalögum.