Samræmd vísitala neysluverðs á Evrópska efnahagssvæðinu í janúar 2026 lækkaði um 0,3 prósent í janúar frá fyrri mánuði. Á einu ári hefur vísitalan hækkað um 2 prósent. Þetta kemur fram á vef Hagstofunnar, sem heldur utan um mælingu og birtingu samræmdu vísitölunnar.

Á Íslandi mældist verðbólga 4,4 prósent í janúar, samkvæmt þessari samræmdu aðferð, og hefur hún farið hækkandi tvo mánuði í röð. Samkvæmt mælingunni er það aðeins í Rúmeníu sem verðbólga mælist meiri en á Íslandi á Evrópska efnahagssvæðinu.

Ísland er á pari við Slóvakíu, þar sem verðbólga mælist 4,3 prósent. Annars staðar á Norðurlöndum mælist verðbólga, samkvæmt þessum samræmda mælikvarða, á bilinu 0,6 prósent – í Danmörku – til 3,5 prósent – í Noregi. 

Verðbólguþróun í Evrópu síðustu mánuði er á skjön við Ísland. Verðbólgan hefur hjaðnað í hverjum mánuði síðustu sex mánuði og er lægri nú en á sama tíma í fyrra. Á Íslandi hefur hún hins vegar sveiflast töluvert og mælist nú bæði hærri en fyrir sex mánuðum og á sama tíma í fyrra. 

Samkvæmt mælingunni hafa allir undirliðir verðbólgunnar hækkað meira á Íslandi en meðaltal Evrópska efnahagssvæðisins, ef frá er talinn húsbúnaður, heimilistæki, og þjónusta tengd reglubundnu viðhaldi heimila annars vegar og kostnaður vegna menntunar hins vegar. 

Þannig hefur matur og óáfengir drykkir hækkað um 5,9 prósent yfir tólf mánaða tímabil á Íslandi en um 2,9 prósent að meðaltali í Evrópu á sama tíma. Húsnæði, vatn, rafmagn og aðrir orkugjafar, eins og þeir eru flokkaðir í mælingunni, hefur hækkað um 6,8 prósent á Íslandi en 1,3 prósent í Evrópu.