Vefsíða og félagatal styrktarsjóðs Sósíalistaflokksins, Vorstjörnunnar, voru yfirtekin á föstudag í aðdraganda aðalfundar, að sögn gjaldkera sjóðsins.
Miklar deilur hafa ríkt í flokknum undanfarna mánuði og ný framkvæmdastjórn tók við í flokknum eftir kosningar á aðalfundi sem hafa verið kallaðar hallarbylting. Ný framkvæmdastjórn undir forystu Sæþórs Benjamíns Randalssonar tók við og hefur verið gagnrýnin á að peningar flokksins frá ríki og Reykjavíkurborg renni inn í Vorstjörnuna.
Í samtali við Heimildina vildi Sæþór ekki mikið segja um yfirtökuna nema að flokkurinn muni fá lögfræðing í málið. „Þess vegna langar mig ekki að segja of mikið eða tjá mig opinberlega um smáatriði,“ segir hann. „Þetta er eitthvað sem við erum að taka alvarlega.“
Vorstjarnan hefur fengið helming af styrkjum ríkisins til Sósíalistaflokksins, um 11,3 milljónir króna í ár, á móti Alþýðufélaginu sem rekur Samstöðina og fær annað eins. Auk þess fær Vorstjarnan allt framlag Reykjavíkurborgar til flokksins, um 2 milljónir á ári.
Ný framkvæmdastjórn flokksins stýri Google-reikningnum
Sara Stef. Hildar, gjaldkeri Vorstjörnunnar og fyrrverandi stjórnarmaður í framkvæmdastjórn flokksins, tilkynnti um yfirtöku vefsíðunnar í Facebook-hópnum Rauða þræðinum í dag. Í samtali við Heimildina segist hún telja sig vita hverjir hafi tekið vefsíðuna yfir.
„Félagið hefur haldið úti vefsíðu, Vorstjarnan.is, með WordPress hugbúnaði og inni í honum er félagaskrá,“ segir Sara. „Félagið missti aðganginn að vefnum og pósthólfi félagsins.“
Hún segir að stjórn Vorstjörnunnar hafi nú endurheimt pósthólfið, fært hýsingu á því og opnað annan vef til að félagar Vorstjörnunnar geti skráð sig að nýju. „Eftir stendur að stjórn félagsins hefur ekki aðgang að upprunalegum vef og þar með talið félagaskrá félagsins af því að þeir sem hafa tekið yfir þann vef svara engum skilaboðum,“ segir Sara.
Aðspurð segist Sara ekki vilja segja hverja hún telur hafa tekið vefinn yfir. „Það er bara svo viðkvæmt mál að ég get ekki talað um það.“
Hún segir hins vegar að yfirtaka vefsins og félagatalsins hafi atvikast með þeim hætti að Google-reikningur Sósíalistaflokksins hafi hýst netfang Vorstjörnunnar en þar var Sara stjórnandi. „Ég fékk tilkynningu um það að sosialistaflokkurinn@sosialistaflokkurinn.is hefði breytt aðgangsorðinu að pósthólfinu,“ segir hún og bætir því við að ný framkvæmastjórn hafi tekið við Google-reikningnum áður en breytingin átti sér stað síðasta föstudag.
Nýjar skráningar í félagið fyrir aðalfund
Deilur hafa staðið um Vorstjörnuna og stöðu hennar gagnvart Sósíalistaflokknum um nokkra hríð. Védís Guðmundsdóttir er skráður formaður Vorstjörnunnar en annar stjórnarmaður, Viggó Jóhannsson, féll frá á síðasta ári. Sara tók við sem gjaldkeri, er prókúruhafi einnig og hefur þegið greiðslu sem starfsmaður félagsins sem hún segir að nemi um 20% af lágmarkslaunum. Félagið sér um rekstur Vorstjörnu alþýðuhúss, félagsheimili flokksins að Bolholti 6.
Sara segir að Sæþór Benjamín hafi áður fengið sömu greiðslu fyrir þessi störf og Karl Héðinn Kristjánsson stjórnarmaður þar áður. Báðir eru þeir í þeim armi sem nú stýrir flokknum, en Sara var í fyrri stjórn. „Þetta staða snýst bara um að kaupa kaffi og G-mjólk og sinna bókunum á húsinu,“ segir hún. „Það hefur verið mest að gera hjá gjaldkera eftir þessar breytingar," segir Sara og bætir því við að hún hafi tekið formlega við sem slíkur 1. júní 2022 samkvæmt fundargerð.
Hún segir persónuleg mál í stjórninni hafa tafið fyrir að halda aðalfund, meðal annars andlát Viggós. „Það er verið að klára ársreikning og átti að kjósa nýja stjórn,“ segir hún, en á Rauða þræðinum birti hún nýtt skráningarform fyrir félaga í Vorstjörnunni. „Nú höldum við því áfram og það rignir inn nýskráningum.“
Sagði Vorstjörnuna lepp framkvæmdastjórnarinnar
Sigrún E. Unnsteinsdóttir, stjórnarmaður í Vorstjörnunni, sagði Heimildinni hins vegar í apríl að hún væri enn skráð í stjórn félagins, en því væri í raun stjórnað af framkvæmdastjórn Sósíalistaflokksins. „Þetta er sjóræningjastjórn,“ sagði Sigrún.
„Það var aldrei ætlunin að vera einhver leppur. Þetta félag er bara í vasanum á framkvæmdastjórn Sósíalistaflokks Íslands,“ bætti hún við og átti þá við fráfarandi framkvæmdastjórn sem var undir forystu Gunnars Smára, þá formanns.
Athugasemd: Í upprunalegri útgáfu fréttarinnar stóð að framlag Reykjavíkurborgar til Sósíalistaflokksins sé rúmar 4,5 milljónir í ár. Það rétta er að framlagið er um 2 milljónir króna í ár.
Athugasemdir