Héraðsdómur Reykjaness hefur úrskurðað mann í áframhaldandi gæsluvarðhald til 3. júní vegna alvarlegra ásakana um ofbeldi gegn eiginkonu sinni og börnum þeirra. Maðurinn, sem hlaut alþjóðlega vernd á Íslandi árið 2022, hefur verið til rannsóknar hjá lögreglu síðan í mars 2024 og sætt nálgunarbanni gagnvart fjölskyldu sinni. Þá hafði lögreglu borist tilkynning um að maðurinn hafi hótað eiginkonu sinni lífláti. 

Í greinargerð lögreglustjórans á Suðurnesjum kemur fram að maðurinn sé undir rökstuddum grun um að hafa beitt eiginkonu sína líkamlegu og andlegu ofbeldi um árabil, bæði áður en þau komu til Íslands og eftir það. Hann er jafnframt grunaður um að hafa beitt nokkur barna sinna kynferðislegu ofbeldi.

Flúði ofbeldið stuttu eftir komuna

Fram kemur í lýsingu á málsatvikum að hjónin og börn þeirra fimm hafi komið til Íslands í mars 2024 en eiginkonan flúið heimilið í sama mánuði. Börnin voru í kjölfarið tekin af manninum og færð til móðurinnar. Þau hafi notið aðstoðar félags- og barnaverndaryfirvalda sem og dvalið í Kvennaathvarfinu.

„Það er mat lögreglu að ætla megi að varnaraðili muni halda áfram brotum meðan mál hans er ekki lokið,“ segir í kröfugerð saksóknara. Þar kemur einnig fram að brotaþolar séu „afar hræddir við varnaraðila“ og að vægari úrræði, eins og nálgunarbann, hafi ekki dugað til að vernda þau.

Samkvæmt dómsskjölum hefur maðurinn ítrekað brotið gegn nálgunarbanni, meðal annars með því að birtast við heimili og skóla barna sinna, senda hótanir í gegnum samfélagsmiðla og reyna að ná sambandi við fjölskylduna með ýmsum hætti. Í einum lið málsins kemur fram að hann hafi mætt fyrir utan heimili brotaþola og öskrað eftir henni, skömmu eftir að hafa fyrr sama dag sent hótanir um að hún hefði „klukkustund til að taka efni niður af samfélagsmiðlum annars ætli hann að láta til skarar skríða, taka stóra ákvörðun og hann hafi engu að tapa,“ eins og það er orðað í úrskurði héraðsdóms.

Barnaníðsefni í tækjum mannsins

Við leit í bíl mannsins fundust hnífur, klaufhamar, einnota hanskar og strigalímband. Þá komu við rannsókn á rafrænum tækjum í hans eigu fram myndir sem teljast til barnaníðsefnis, auk grófs kláms.

Verjandi mannsins mótmælti kröfu lögreglu og benti á að hann hefði ekki brotið gegn nálgunarbanni meðan hann væri í gæsluvarðhaldi, þrátt fyrir að hafa aðgang að síma og neti. Þá neitar maðurinn sök og segir ásakanirnar koma frá eiginkonu sinni sem hann segist ekki vilja meiða.

Dómurinn hafnaði þó vörnum hans og vísaði meðal annars til úrskurða Landsréttar þar sem fram kom að ætla mætti að maðurinn héldi áfram brotum gengi hann laus. „Þykir því enn verða að leggja til grundvallar [...] að ætla megi að varnaraðili muni halda áfram brotum gangi hann laus á þessu stigi,“ segir í niðurstöðu dómsins.

„Að mati sóknaraðila eru vægari úrræði fullreynd,“ segir í kröfu lögreglu vegna gæsluvarðhaldsins.

Lögreglan hefur jafnframt lagt fram kröfu um geðrannsókn, sem þegar hefur verið samþykkt af dómstólum.