Almar , gjörningalistamaður og málari, hefur sent frá sér sína fyrstu skáldsögu og hóf að lesa upp úr henni um klukkan 18 í gær, mánudag. Hann er enn við lestur og er kominn á þriðja og síðasta bindi sögunnar sem ber heitið Mold er bara mold. Gjörningurinn stendur yfir í Tjarnarbíói þar sem hægt er að bera Almar augum en upplesturinn hefur verið í beini streymi hér á Heimildinni síðan hann hófst.
Almar varð þjóðþekktur árið 2015 sem Almar í kassanum eftir að hann dvaldi nakinn í heila viku inni í glerkassa í Listaháskólanum.
Sameiginlegt útgáfuhóf Almars og Braga Páls Sigurðssonar hófst síðdegis í gær, en nýjasta skáldsaga Braga Páls heitir Næstsíðasta líf Jens Ólafssonar Olsen. Þar tók hljómsveit Braga Páls, Dungeon Boyz, lagið, þá las Bragi Páll upp úr bók sinni og síðan hóf Almar lesturinn.
„Þú heyrir kannski í honum hér í bakgrunninum,“ segir Snæbjörn Brynjarsson, leikhússtjóri Tjarnarbíós, þegar blaðamaður sló á þráðinn. Snæbjörn sagðist vera í sama rými og Almar, að fá sér kaffibolla og vinna við tölvu.
Uppleggið hafi verið að Almar tæki sér engar pásur frá lestrinum og myndi ekki fá sér að borða, en hann er með vatn hjá sér, auk þess sem Snæbjörn hefur fært honum kaffi. „Þetta hefur gengið mjög vel. Hann er einu sinni búinn að dotta í miðjum lestri en annars hefur hann haldið sér vakandi,“ segir hann.
Fjöldi fólks var viðstaddur þegar útgáfuhófið byrjað í gær en síðan þá hefur fólk litið við til að bera gjörninginn augum og hlýða á lesturinn. Snæbjörn segir Almar vera sýnilegan í gegn um glugga en Tjarnarbíó stendur við Tjarnargötu. Þá eru einnig hátalarnar þannig að upplesturinn heyrist út á götu. Túristar sem áttu leið í Ráðhúsið hafa heyrt óminn og komið inn til að sjá hvað væri að gerast í Tjarnarbíói.
Snæbjörn segir að allt hafi gengið sinn vanagang í húsinu í gærkvöldi, þar hafi verið skúrað í dagslok og húsinu læst, en Almar haldið áfram að lesa, og nú er húsið aftur opið. „Fólk getur komið og fengið sér kaffibolla,“ segir hann.
Skáldsagan Mold er bara mold er í þremur bindum sem koma saman í kassa. Undirtitill verksins er Litla systir mín fjöldamorðinginn, og utan á kassanum er spurt: Er hægt að gerast fjöldamorðingi fyrir misskilning?
Hlutarnir þrír kallast Með Venus í skriðdreka, Þindarlaus frásögn af erfiðum degi manns í Efra-Breiðholti, og Frelsið er takmarkað.
Almar er kominn á þriðja bindi og lýkur hann lestrinum þegar hann hefur klárað að lesa upp síðustu bókina. Hugmyndin var að hann yrði þarna að hámarki í sólarhring en reikna má að hann ljúki lestrinum síðdegis í dag.
Athugasemdir