Ég náði að slaka svo vel á í sveitinni um helgina. Hafði það reglulega gott. En ég hefði mátt vita að þetta væri svikalogn,“ segir Bjarki Þór Grönfeldt, sem var aðstoðarmaður Guðmundar Inga Guðbrandssonar, félags- og vinnumarkaðsráðherra, þar til á þriðjudagskvöld. Bjarki átti stórafmæli á mánudag, daginn eftir að Bjarni Benediktsson, formaður Sjálfstæðisflokksins, sleit stjórnarsamstarfinu. Eftir að hafa tekist á við stór mál í haust og að afloknum landsfundi Vinstri grænna undir stjórn nýs formanns, taldi Bjarki að skapast hefði örlítið rými til að njóta fallega haustsins í ró og næði.

En svo var friðurinn úti.

Naut afmælis í skugga stjórnarslita

„Ég lít svo á að ég hafi fengið lýðræðið í afmælisgjöf,“ segir Bjarki spurður um hvernig það hafi verið að fagna þrítugsafmæli við þessar óvenjulegu aðstæður. Afmælisdagurinn er 14. október en daginn áður hafði Bjarni boðað til blaðamannafundarins afdrifaríka. „Ég hafði vonast til þess að samstarfið myndi halda áfram og flokkarnir myndu ná að sameinast um ákveðin forgangsmál. Það var mín skoðun að það væri langbest að kjósa í vor. En svo var þessi ákvörðun tekin af okkar samstarfsflokki og hún stendur auðvitað bara.“

Mitt í ólgu og óvissu segist Bjarki þó hafa náð að njóta afmælisdagsins. Hann kom með köku í vinnuna og fékk húfu í afmælisgjöf frá samstarfsfólkinu, enda hafði hann verið húfulaus í haustferð ráðuneytisins nokkru áður og mörgum fundist það helst til kuldalegt.

Skemmtilegt gigg

Eftir að Vinstri græn ákváðu að sitja ekki í starfsstjórn þeirri sem nú starfar í landinu eru þingmenn flokksins ekki lengur ráðherrar og Bjarki missti því vinnuna. Hann nýtur þó biðlauna næstu þrjá mánuði. 

Þegar hann er spurður hvernig honum líði vitnar Bjarki í dr. Seuss: „Ekki gráta af því þessu er lokið. Brostu yfir því að það gerðist!“ Þetta segist hann ætla að tileinka sér.

Bjarki segist hafa notið þess mjög að vinna í ráðuneyti félags- og vinnumarkaðsmála. Er hann tók við starfi aðstoðarmanns Guðmundar Inga í febrúar hafi hann gert sér grein fyrir því að ekki væri um starf til langrar framtíðar að ræða. Á þeim tímapunkti hafi enda verið orðið ljóst að líklega væri farið að styttast í annan enda samstarfs Sjálfstæðisflokks, Vinstri grænna og Framsóknarflokks.

„Ég hef alltaf séð þetta sem svona gigg,“ segir hann um aðstoðarmannsstarfið. Gigg sem varð mun skemmtilegra en hann hafði átt von á og mjög lærdómsríkt að auki. Nú taki hins vegar kosningabaráttan við. 

Þetta er ekki í fyrsta skipti sem Bjarki heldur upp á afmæli sitt í kosningabaráttu sem hann sjálfur tekur þátt í sem félagi í Vinstri grænum. Það gerði hann eftir stjórnarslit 2016 og aftur 2017. „Ég elska kosningabaráttu,“ segir Bjarki fullur eftirvæntingar. Spurður hvort hann verði í framboði í þetta sinn svarar hann eins og sannur pólitíkus: „Menn hafa komið að máli við mig!“

Í fullri alvöru segir hann svo: „Ég hef fengið hvatningar úr nokkrum áttum og er þakklátur fyrir það en ætla ekki fram í þetta skiptið. En hver veit hvað framtíðin ber í skauti sér.“