„Við erum að reyna að höfða til grunn­gilda Druslu­göng­unnar því við finnum aðeins meira bakslag en í fyrra og í hitteð­fyrra,“ segir Lísa Margrét Gunn­ars­dóttir, ein skipu­leggj­enda Druslu­göng­unnar.

„Það er meira um nei­kvæð við­brögð við því sem við erum að gera. Venju­lega hefur þetta verið mjög skemmti­legt og við fundið stuðn­ing úr öllum áttum en við erum búin að finna fyrir aðeins meiri mót­stöðu í ár.“

Druslu­gangan verður haldin í tólfta sinn í Reykja­vík á laug­ar­dag. Gengið verður frá Hall­gríms­kirkju klukkan 14 á Aust­ur­völl þar sem sam­stöðu­fundur með ræðu­höldum og lif­andi tón­list fer fram.

Aðspurð um hvernig þetta mót­læti hafi lýst sér segir hún frá nýlegu atviki þar sem teymi Druslu­göng­unnar kynnti við­burð­inn á göngum Kringl­unnar. „Maður á þrí­tugs­aldri vatt sér upp að einni í skipu­lags­teym­inu, sem er kona á miðjum aldri, og hreytti framan í hana að hún gæti troðið dreifi­blað­inu okkar upp í rass­gatið á sér, alveg brjál­aður,“ segir Lísa Margrét. „Ég hef aldrei lent í þannig áður. Við höfum smá áhyggjur af bakslagi meðal yngra fólks og erum búin að búa til TikTok reikn­ing til að höfða til þeirra. Þar er búið að vera mikið um nei­kvæð komment.“

„Við höfum smá áhyggjur af bakslagi meðal yngra fólks“

Hún segir það til marks um mik­il­vægi þess að halda áfram bar­átt­unni. „Meira að segja eitt kommentið var „klæðið ykkur sóma­sam­lega, það ber vitni um sjálfs­virð­ingu“,“ segir hún. „Gangan byrj­aði árið 2011 þegar lög­reglu­maður í Toronto sagði konum að klæða sig ekki eins og druslur svo þeim yrði ekki nauðgað. Og núna 2024 er þetta aftur orðin staðan þrátt fyrir mikla vit­und­ar­vakn­ingu á Íslandi und­an­farin ár.“

Dagur samstöðu þolenda

Lísa Margrét segir grunn­gildi göng­unnar snúa að því að neita að sam­þykkja nauðg­un­ar­menn­ingu og háa tíðni kyn­ferð­is­brota í sam­fé­lag­inu sem eðli­legan hluta sam­fé­lags­ins. „Okkur finnst aldrei mik­il­væg­ara að ganga en þegar þetta er minna í tísku eða verið er að hrópa ókvæð­is­orð að okkur eða senda okkur ljót skila­boð og segja okkur að þegja,“ segir hún. „Þá finnst okkur enn mik­il­væg­ara að hafa hærra.“

„Okkur finnst aldrei mik­il­væg­ara að ganga en þegar þetta er minna í tísku“

Gangan er vett­vangur fyrir þolendur kyn­ferð­is­of­beldis og þau sem styðja vilji við mál­stað þeirra til að finna sam­stöðu, útskýrir Lísa Margrét. „Við tókum könnun eftir göng­una í fyrra um hvað Druslu­gangan þýddi fyrir fólki og það var yfir­þyrm­andi þetta svar; að þetta sé eini dagur árs­ins þar sem fólk veit að því er trúað, það finnst það ekki ein­mana og getur skilað skömminni.“

Í vik­unni verða haldnir ýmsir við­burðir til upp­hit­unar og fjár­öfl­unar fyrir göng­una. Bingókvöld Druslu­göng­unnar fer fram á Loft kl. 20 í kvöld og á fimmtu­dag kl. 20 er Pepp­kvöld á Lemmy í Aust­ur­stræti.