Hvítklæddir mormónar í tónlistarmyndbandi Ástþórs

Á meðan kosn­inga­bar­átt­unni um hver yrði næsti for­seti lýð­veld­is­ins stóð gáfu nokkrir fram­bjóð­endur út lög til að vekja athygli á fram­boðum sínum. Framboð Höllu Tóm­as­dóttur sendi til dæmis frá sér Halla T House Mix sem Matthías Eyfjörð bjó til. Þá vakti Jón Gnarr tals­verða athygli með lag­inu Gefum honum von þar sem lands­þekktir tón­list­ar­menn s.s. Sigurjón Kjart­ans­son, Ragn­hildur Gísla­dóttir og Króli sungu meðal ann­ars inn á.

Öllu furðu­legra var þó lagið Kjósið frið og með­fylgj­andi tón­list­ar­mynd­band sem birt­ist frá fram­boði Ástþórs Magn­ús­sonar.

Lagið er sungið af kvenna­kór sem lof­samar Ástþór Magn­ús­son og kallar hann meðal ann­ars Ástþór Krist Magn­ús­son. Radd­irnar virð­ast næstum óraun­veru­legar í fram­burði sínum en sú kenn­ing hefur verið viðruð á sam­fé­lags­miðlum og í fjöl­miðlum að lagið hafi jafn­vel verið búið til með gervi­greind. 

Í mynd­band­inu sem fylgir lag­inu má sjá klippur af Ástþóri við Bessa­staði, gang­andi um með blöðrur, auk þess sem klippum af honum í sínu fyrsta fram­boði árið 1996 bregður fyrir. Þá má sjá frið­ar­dúfur fljúga og hvít­klæddar og ham­ingju­samar ungar konur syngj­andi ber­fættar úti í miðjum skógi. 

Klippur af bandarískum kór

Þau hug­renn­ing­ar­tengsl vakna að það séu þessar konur sem syngi lagið sem inni­heldur meðal ann­ars lín­urnar: „Forseti lýð­veld­is­ins Ástþór Magn­ús­son. Hann er ást, hann er Þór.“ Í upp­hafi mynd­bands­ins kemur fram að fram­boð Ástþórs þakki stuðn­ings­mönnum í Espi­gerði fyrir aðsent lag og texta.

Ljóst er þó að stuðn­ings­menn­irnir í Espi­gerði eru ekki þeir sem fram fram koma í mynd­band­inu við Kjósið frið. 

Heim­ildin fékk vina­lega ábend­ingu þess efnis að mynd­böndin af hvít­klæddu syngj­andi ungu kon­unum séu í raun frá kórnum BYU Noteworthy, kvenna­kór á vegum Brigham Young háskól­ans í Utah. Háskól­inn var stofn­aður af einum helsta leið­toga morm­óna­kirkj­unnar og er fjár­magn­aður af henni.  Yfir­gnæf­andi meiri­hluti nem­enda við skól­ann eru morm­ónar, eða 99% árið 2021 og má því vel ætla að kon­urnar séu morm­óna­trúar. 

Fyrir átta árum breiddi kór­inn yfir Amazing Grace og birti tón­list­ar­mynd­band með. Mynd­bandið má sjá hér að neðan:

Fyrir neðan mynd­bandið á Youtube stendur að höf­unda­rétt­inn að mynd­band­inu eigi BYU Records.

Sagðist ekki vita hver bjó myndbandið til og skellti á

Heim­ildin hafði sam­band við Ástþór til að spyrj­ast fyrir um málið. En hann vildi meina að hann vissi ekk­ert hverjir hefðu sent honum lagið. 

„Þeir köll­uðu sig Espi­gerð­is­kór­inn, meira veit ég ekki. Þú ert að biðja um ein­hverjar gamlar fréttir. Það er búið að segja frá þessu. Það voru tveir eða þrír stuðn­ings­menn að búa til mynd­bönd og músík. Meira veit ég ekki,“ segir Ástþór.

Þannig að vídjóið var ekki fram­leitt af þér?

„Nei.“

Ég var að spá hvort þú hefðir sett inn mynd­bönd af konum að labba í...

„Hverslags gamlar tuggur ert þú að taka upp? Lestu bara frétt­irnar inni á vefnum okkar og frétta­til­kynn­ingar sem við höfum sent. Þessar upp­lýs­ingar eru allar búnar að koma fram.“ 

Ástþór full­yrti þá að mynd­bandið hefði verið aðsent en skellti á þegar blaða­maður spurði hvort það ætti við um mynd­bandið í heild sinni.