Jóhann Páll: „Það voru mistök hjá mér“

Jóhann Páll Jóhanns­son, þing­maður Sam­fylk­ing­ar­innar, steig upp í pontu á Alþingi í gær þar sem hann kall­aði eftir því að frum­varp sem var nýsam­þykkt úr annarri umræðu yrði dregið aftur til baka í umsögn. „Frum­varpið sem kom upp­haf­lega inn í þingið hafði þetta yfir­lýsta mark­mið, að styðja sér­stak­lega við sauð­fjár­rækt­ina og stór­gripa­rækt með því að liðka við auk­inni hag­ræð­ingu. Hins vegar var frum­varps text­inn mein gall­aður.“

Jóhann segir að breyt­ingar hafi orðið á frum­varp­inu í miðju ferli en hann studdi meiri­hluta­á­lit atvinnu­vega­nefndar. 

Helgi Seljan stýrði 17. þætti Pressu í dag. Ræddi hann við Jóhann Pál ásamt Lilju Alfreðs­dóttur, menn­ingar- og við­skipta­ráð­herra um nýsam­þykkt bú­vöru­lög.

Eftir að nefnd­ar­á­litið var birt á vef Alþingis barst Jóhanni Páli ábend­ingar frá sam­keppn­is­lög­fræð­ingum og sér­fræð­ingum í EES rétti að ákveðið mis­ræmi væri milli frum­varps­ins og upp­haf­legu til­lög­unnar. Jóhann sagði að búið væri „að opna með frekar lúmskum hætti í raun­inni á bara opinn tékka til sam­runa og sam­ein­ingar, algjör­lega óháð því hvaða búgreinar við erum að tala um og óháð því hvort um sé að ræða afurða­stöðvar undir stjórn bænda eða í meiri­hluta­eigu bænda. Þess vegna kall­aði ég eftir því, í ljósi þess hversu miklar þessar breyt­ingar voru. Þær voru svo miklar að í raun­inni má jafna þessu við nýtt frum­varp.“

Helgi: En þú samt skrif­aðir undir?

„Já það voru mis­tök hjá mér. Þetta voru víð­tæk­ari heim­ildir heldur en ég hafði áttað mig á þegar ég lýsti mig sam­þykkan nefnd­ar­á­lit­inu. Ég gekk bara aðeins of hratt um gleð­innar dyr vegna þess að ég og við í Sam­fylk­ing­unni erum mjög áfram um það að lög­festa auknar und­an­þágur frá sam­keppn­is­lögum sem liðka fyrir hag­ræð­ingu slát­ur­húsa í þágu sauð­fjár­bænda og þeirra sem eru í naut­gripa­rækt“

Frumvarpið endurskrifað

„Frum­varpið er end­ur­skrifað án þess að það fái eðli­lega með­ferð sem nýtt frum­varp eins og þetta raun­veru­lega var,“ sagði Jóhann Páll.

Lilja sagði að sam­keppni þyrfti að vera rík inn­an­lands. „Íslenskir bændur eru auð­vitað í mik­ill sam­keppni við inn­flutn­ing. Þetta frum­varp er auð­vitað að gera það að þeir geti verið í betri. Geti boðið lægra verð með sínum vörum. Það sem ég von­ast til er að fram­leiðsla og fram­leiðslu­kostn­aður lækki og við séum frekar að halda í við verðið en hitt.“

Jóhann telur það slæmt að sam­þykktar séu víð­tæk­ari und­an­þágur en honum þykir til­efni til. Hann sagði hags­munum almenn­ings og hags­munum launa­fólks á Íslandi og hags­munum bænda vera stillt upp sem and­stæðum „sem er óþol­andi, en hér er það bara að veru­legu leiti stjórn­mál­unum að kenna með því að rífa í gegnum þingið á met hraða frum­varp sem var með frum­varpstexta sem gengur algjör­lega gegn upp­haf­legu mark­miði frum­varps­ins.“

Nýjasta þátt Pressu má sjá hér:

Fréttin hefur verið upp­færð