Næstum 81 prósent landsmanna eru ánægð með störf Guðna Th. Jóhannesson sem forseta Íslands, en Guðni tilkynnti um síðustu áramót að hann muni ekki sækjast eftir endurkjöri í komandi forsetakosningum sem fara fram 1. júní næstkomandi. 

Vinsældir Guðna, sem var fyrst kjörinn forseti Íslands árið 2016, hafa aldrei mælst meiri í könnunum Gallup. Síðast þegar ánægja með störf hans var mæld, fyrir þremur árum síðan, sögðust 73 prósent vera ánægð með sitjandi forseta. 

Ólafur Ragnar tók dýfur

Guðni tók við af Ólafi Ragnari Grímssyni sem hafði setið sem forseti í 20 ár. Ólafur Ragnar mældist afar vinsæll fyrstu ár sín í embætti þegar 82 til 87 prósent sögðust ánægð með störf hans. Síðan fóru þær, tímabundið, að dala og árið 2004, sama ár og Ólafur Ragnar beitti neitunarvaldi fyrstur allra forseta til að stöðva framgang fjölmiðlafrumvarpsins svokallaða, fóru þær niður í 66 prósent. Vinsældir Ólafs Ragnars jukust hins vegar á ný og á bankahrunsárinu 2008 sögðust 87 prósent vera ánægð með störf hans. Ólafur Ragnar hafði farið mikinn í því að tala upp kosti íslensku útrásarinnar árin á undan og ári síðar, eftir að bankakerfið hafði hrunið nánast í heild sinni með miklum samfélagslegum afleiðingum, hrundu vinsældir hans. Einungis 31 prósent sögðust þá ánægð með forseta landsins.

Ólafur Ragnar tók hins vegar harða afstöðu í Icesave-málinu svokallaða og synjaði lögum því tengdu tvívegis um undirritun forseta þannig að þau fóru í þjóðaratkvæðagreiðslu. Við það jukust vinsældir hans á ný, mældust 60 prósent árið 2012 og 56 prósent árið 2015, siðasta heila ár hans í embætti. 

Nokkuð almenn ánægja

Ánægja með störf Guðna er nokkuð almenn. Konur eru aðeins líklegri til að vera ánægð með hann en karlar og háksólamenntaðir eru það frekar en þeir sem eru með grunnskóla- eða framhaldsskólapróf sem æðstu menntun. 

Kjósendur Samfylkingarinnar og Framsóknarflokks eru ánægðastir allra með Guðna, en 90 til 92 prósent þeirra lýsa þeirri skoðun sinni í könnun Gallup. Píratar eru skammt undan þar sem 89 prósent þeirra eru ánægðir með forsetann og 84 prósent kjósenda Vinstri grænna eru saman sinnis. 

Minnst er ánægjan á meðal kjósenda Miðflokksins, þar sem hún mælist 67 prósent, og hjá kjósendum Sjálfstæðisflokks, en 73 prósent þeirra eru ánægðir með störf Guðna.