Lífeyrissjóðirnir skoða möguleikann á að veita Grindvíkingum greiðsluskjól vegna yfirstandandi náttúruhamfara og óvissuástands í Grindavík til að létta á greiðslubyrði þeirra. Bankarnir felldu niður vexti og verðbætur af lánum Grindvíkinga í þrjá mánuði fyrr í nóvember og skoða lífeyrissjóðir nú að gera hið sama, samkvæmt tilkynningu frá Landssamtökum lífeyrissjóða.
Lífeyrissjóðirnir hafa nú þegar tryggt Grindvíkum tímabundið greiðsluskjól vegna sjóðfélagalána og fresta greiðslu afborgana, vaxta og verðbóta.
Kallað hefur verið eftir því að lífeyrissjóðirnir gangi lengra og geri slíkt hið sama og bankarnir, það er fella niður vexti og verðbætur til þriggja mánaða vegna húsnæðislána Grindvíkinga.
Arion banki, Íslandsbanki og Landsbankinn gerðu samkomulag, í samvinnu við Samtök fjármálafyrirtækja (SFF), um að fella niður vexti og verðbætur af íbúðalánum Grindvíkinga í þrjá mánuði. Samkomulag þessa efnis var undirritað 22. nóvember. Þetta var gert vegna yfirstandandi náttúruhamfara og óvissuástands í Grindavík.
Áður höfðu bankarnir ætlað að mæta stöðu Grindvíkinga, sem var gert að rýma bæinn um miðjan nóvember og eru nú í tímabundnu húsnæði oft með tilheyrandi viðbótarkostnaði, með því að frysta afborganir af íbúðalánum þeirra en leggja vexti og verðbætur við höfuðstól lánanna. Það hafði verið harðlega gagnrýnt, meðal annars af ráðherrum í ríkisstjórn og öðrum stjórnmálamönnum.
Fréttin hefur verið uppfærð.
Athugasemdir (1)